Les Pages Jèrriaises

Un rêve

J'tais en Êcôsse et j'têmes eune dgaîngue à viagi par un bein p'tit c'mîn d'fé, quâsiment coumme lé train d'eune faithe à fanne, lé travèrs d'l'Êcôsse du nord. Eune partie du c'mîn crouaîsait un paysage de clios ensolilyi auve eune alîngnie d'bouais au pourportant d'la lîngne du c'mîn d'fé. Les ouadgîns 'taient ouèrts coumme un char-à-bancs. Souotre lé train à stînme y'avait la police tchi 'tait à nos siéthe. J'arrivînmes à eune pétite ville ou un village sus la côte - le c'mîn d'fé pâssait par les c'mîns du mitan du village et y'avait un arrêt. J'restînmes dans not' ouadgîn et v'là la police tch'arrivit souotre nous. J'tais habilyi d'eune quémînse en satîn et souaie, blianchâtre mais rîlyie tchi lithait un mio dans l'solé - les pouongnets des manches 'taient grands et longs et n'avaient pon d'boutons - pouor l's amather y'avait d's êcrouettes et êcrous - p'tits, d'licats et en argent, coumme d'la bijout'tie. Mais mes manches 'taient dêcroués - nou m'avait vole d's êcrouettes et êcrous. Les policemainnes Êcôssais vîndrent à bord et entchêtîdrent en tchestchionnant un houmme tchi 'tait assis un coupl'ye de bancs driéthe mé dans l'ouadgîn. Ch't houmme-là avait d's êcrouettes et êcrous mais i' n'taient pon les mêmes que les meins. Ché n'tait pon li tchi 'tait l'voleux. En foucenotant dans l'aithe, jé trouvis d's êcrouettes et êcrous tch'avaient tchée entre les plianches du fond du ouadgîn - mais ieux, i' n'taient pon les meins et i' n'sembliaient pon êt' en argent nitout.

Y'avait eune présentâtion dans un thiâtre; nou dansait sus la strade. Tout 'tait bein nièr mais y'avait des veues, des projecteurs, tchi siévaient les dans'rêsses. Y'avait deux dans'rêsses, des belles hardelles à courts bruns g'veux, tchi présentaient eune danse modèrne atout des lassos. I' faîthaient vither les lassos et en faîthaient des noeuds en lus liant atout la corde. I' 'taient habilyies en courts nièrs habits. Raîque un nièr cors sus l'haut du corps, et chenna êcoqu'té sis bas qu'i' n'couvrait dgéthe lus seins, montant juste à la hauteu des boutons ès seins. Mais i' touônnaient et ratouônnaient dans lus danses si quédaine en manniant lus lassos qu'dans la nièrcheu et la leunmiéthe tchi pâssait artistiquement sus la strade nou 'tait pouor d'vinner s'i' 'taient à danser les seins nus ou pon.

Rêvé l'19/10/2015
 

Viyiz étout:

 

Les Pages Jèrriaises