|
Par un bieau jour le chincq de Mai, Marie me dis, si tu'étais bon Tu mettrais lagrès au cadet, Pour allai m'queurre un mio d'sablion. Tout d'suite j'attelle man vier bidet, Que j'criais doux comme un mouton, Mais aussitôt qui fut attélet, Saldier ch'tai un vrai démon. J'étais à peine sorti d'siès nous, Qui l'vai l'drièthe et pis ouimbré; N'an j'nai pas d'peux d'vos dithe à tous, Que mes q'veux portaient m'an chapé, Quand j'viyais volé en bûquettes, Un bouan hernais q'je v'nais d'avé; Et cadet la coue en trompette, Saladier à forche de r'hué. Quand j'arrivi au haut du Mont, M'an gaillard se trouve arrêtet, Par deux ou trais hardis lurrons, Qui heutheusement me l'ont dêliet; Et là j'dêguerpe d'dans l'quéthiot, Car j'étais sale et tout trempet, J'avais servi d'bliancq à ch'tagiot; Saladier de maudit cadet. De là j'menr'vins à la maison, Et tout honteux, à travers paies, Laissant m'en hernais en minchon, A la Maison du bas d'la Haie. A mainqui q'min de ma bicoque, J'rencontre entre-aûtre un moustachi, Qui dis v'la ty un homme malprôpre, Et saladier tout hernachi. L'a d'sus j'lus conte men'avantuthe; Je m'nais man chva par le bridot, J'avais ses culasse sus ma hûthe, Oui j'crai que j'tais à mainqui fo. Yun m'dis illia une faith' demain, Donne li du gin pour l'ennivrer, Et bride le comme un jenne poulain, Vend li s'tu peux man saladier. Quand Marie m'vit à la maison, Sans m'an hernais ni sans sablion, Ou m'dis salope ivroigne que tu'est, Tu vains fripon d'pâné l'hernais, Et pis de la à la boutique Tu tes saoûlet comme la bourrique, Tu'est tout crottet, male et muolli, V'la qui fait un bieau salagui. Un D'cendant d'Adam |
Viyiz étout: