Les Pages Jèrriaises

Un rêve

J'têmes à eune rêunnion politique dans l'allée d'eune églyise en Ville. L'églyise 'tait quâsiment muchie driéthe les maîsons d'eune rue et 'tait coumme eune chapelle îndépendante. L'allée allait tout l'tou d'l'églyise tchi 'tait un huit-carres en forme. Dans l'allée y'avait des meubl'yes et des pliantes et des portraits sus les muthâles. Y'avait un vitchet dans l'allé par tchi nou pouvait monter dans la tchaîthe dé d'dans l'églyise. J'èrgardis par l'uss'sie d'la tchaîthe et j'admithais la salle dé l'églyise dé la Nouvelle Vie (ch'tait san nom). La salle 'tait en forme dé huit carres auve des colonnes et bancs l'tou d'eune grande bolle en blianc marbre au mitan d'la salle. Dé l'ieau d'gouttait du pliafond dans la grande bolle - la bolle 'tait s'posée d'aver dé l'ieau d'dans mais y'aver chein tch'i' pathaîssait un p'tit creux dans l'lief dé tchi l'ieau d'gouttait. I' n'y'avait pèrsonne dans la salle dé l'églyise et tout 'tait paîsibl'ye sénon pouor lé brit des d'gouts dg'ieau. Les colonnes et les muthâles d'l'églyise 'taient en vèrt et blianc marbe tout richement couleuthé et êcliaithi par la lueu du jour. Y'avait du feugu'thé étout entre les colonnes. Sus les muthâles y'avait l'symbole d'l'églyise - eune clié. En m'èrtouônnant j'èrgardis par eune f'nêt' dans l'allée tchi s'adonnait au d'houors. J'viyais un p'tit bel et eune v'nelle tchi m'nait à un aut' bâtisse tchi 'tait modèrne et en brique couleu d'myi. Ch'tait un aut' bâtisse ou salle, ofûche des offices, d'l'églyise d'la Nouvelle Vie et sus la côtchiéthe du bâtisse y'avait l'symbole d'la clié mais stylistiquement pus modèrne coumme un logo: eune lîngne et deux cârrieaux pouor èrprésenter les dents d'la clié. Ch'tait en couleu d'or et en méta et attatchi ès briques.

Rêvé l'14 d'Octobre 2014

 

Viyiz étout:

 

Les Pages Jèrriaises