J'tais dans eune ville sus la côte du Sud dé l'Angliétèrre. Chute ville avait eune longue grève dé sablion, eune espliannade au pouportant, et des rues tchi montait driéthe l'espliannade. Y'avait d's hôtels, mais pon des grandes. Les bâtisses n'taient pon neus; y'avait eune cathédrale dans la ville et à chein tchi pathaîssait eune unnivèrsité - y'avait hardi d'êtudgiants.
Y'avait eune grande bordée dans un cabathet dans eune hôtel et l'monde quémenchîtent à danser eune conga. Jé jouaingnis la lîngne d'la conga et j'dansînmes horte l'hôtel et d'valînmes sus la grève tchi s'êtrav'lait à gauche tout l'long d'la ville sus la côte jusqu'à bein au liain.. Lé solé lithait et i'faîthait bein caud. La grève 'tait toute affaithée et un tas d'monde 'taient mâtés sus l'sablion. La lîngne d'la conga avait du train pouor pâsser avaû la grève entre les gens. Y'en avait tchi jouaingnaient la lîngne, mais la lîngne d'la conga fut copée et nou prînt du temps à nos rassemblier eune eune lîngne. Tandi qu'des buts s'pathés d'la lîngne pâssaient, les cheins tchi 'taient à la tête d'la lîngne changeaient et auprès eune pause j'tais, mé, quâsîment à la tête d'la lîngne. Y'avait auve mé eune femme et deux nièrs hommes, deux fréthes à chein tchi pathaîssait, tchi 'taient habilyies en c'mînses bein couleuthées. À la fîn j'vînmes eune hôtel tchi s'donnait sus la grève où'est qué j'pouôrrêmes tchitter la grève et la grande foule et continnuer la conga sus l'espliannade. L'hôtel n'enfachait pon la grève pouor tchique raison, mais y'avait l'avant à l'hôtel, un bel et d's apparténances. Les p'tits bâtisses d's apparténances 'taient à gauche, du bourd dé ioù qué j'dansêmes. Au mitan y'avait l'bel, eune pièche ouèrte et couèrte dé gravi pouor partchi les boulants. À drouaite y'avait l'hôtel. J'tais achteu l'deuxième dans la lîngne d'la conga et j'touônnînmes à gauche ès apparténances et montînmes d'la grève sus l'bas pliat lief du pus d'amain des apparténances - ch'tait eune manniéthe dé shed en bouais peint en blianc. Mais quand j'avêmes crouaîsi l'pliat lief, j'rêalîsînmes, les deux d'nous à la tête d'la lîngne, qu'i' y'avait un dro d'l'aut' bord sus lé c'mîn tchi m'nait entre les apparténances au bel. J'nos êlîndgînmes bas, les deux d'nous, et sîngnalînmes ès aut's dé n'pon siéthe. L'restant d'la lîngne d'la conga d'valîtent par eune montée d'un bord du shed. La conga continnuit en pâssant par l'bel d'l'hôtel pouor arriver sus l'espliannade. Un mio à gauche y'avait eune rue tchi montait l'mont. Y'avait du trafi sus la rue et au mitan d'la rue y'avait un monument en gris chînment. Ch'tait eune haute colonne en style d'Art Déco, un mio coumme la cheunm'née d'un navithe, auve eune bande rîlyie l'tou du mitan et un êtchusson et eune înscription sus lé d'vant. Y'avait des bordeuses l'avant au monument. J'décidînmes dé continnuer la conga en montant amont chutte rue.
Nou dit, "Mais nou peut y pâsser raîque en eune direction."
Et tchitch'un d'aut' à dithe, "Tout l'monde aime tréjous vîsiter Brooklyn."
La rue 'tait assez courte et au haut j'touônnînmes à gauche où'est qu'i' y'avait un c'mîn bouaîsi. Dé vrai y'avait si peu d'run entre les bouais et la vèrduthe qué nou-s'avait à pousser pouor avanchi. Et bétôt y'avait raîque du louga pouor sé sîlyi entre la vèrduthe à gauche et eune muthâle à drouaite. La lîngne d'la conga fut compliètement s'pathée, et j'tais à man tout seu pouor lé temps qué j;'arrivis pouor dêjeuner dans eune salle d'hôtel où'est qu'ma bike 'tait partchie dans eune armouaithe à habits. Y'avait du café, du mangi et des gâzettes à liéthe. La salle 'tait meubliée înformellement en rouoge. J'avais assez d'temps pouor m'èrpôser d'vant tchitter l'hôtel.
Rêvé l'25 d'Janvyi 2015
Viyiz étout: