Nou m'avait învité à un dînner d'Pâraisse. J'avais mîns man pâsseport tchiquebord, mais auprès tout ché n'tait pon d'mêtchi d'aver man pâsseport auve mé pouor aller à la campangne. J'm'en fus à pid par les c'mîns et j'vîns à eune aubèrge remplyie d'monde. J'têmes attabliés et v'là tchi vîntent nos r'jouaindre à la tabl'ye des vîsiteurs: un janne moussieu barbu et sa danme. Li, i' nos d'mandit s'i' y'avait en Jèrri d's exempl'yes du travas d'un cèrtain architecte domestique monumenta. J'voulais lî dithe qué nânnîn mais les fortifications Allemandes monumentales 'taient hardi întéthêssantes.
Y'avait un tas d'monde à lus pronm'ner et à pédaler par les c'mîns d'la campangne et par monts et par vaux dans l'bieau solé. Des troupieaux d'scouts crouaîsaient les clios par des sentes et il' arrivaient couèrts dé pité à l'arrêt d'beusse. Y'avait tant d'scouts qué les beusses en 'taient remplyies et y'avait des troupieaux d'scouts tch'avaient à espéther longtemps ès arrêts d'beusse.
Rêvé l'4/4/2023
Viyiz étout: