Les Pages Jèrriaises

Un rêve

J'tais à marchi dans un par, J'avêmes 'té à pratitchi d's èrcitâtions en tchoeu dans eune salle, et achteu j'tais hors dans l'par. Dans l'par y'avait des caûminnes entouothées dé p'tits gardîns auve des bordeuses pliantées dé p'tites pliantes et dé p'tites flieurs toutes flieuthies en toutes les couleurs. Y'avait des bouais entre les caûminnes et les p'tits gardîns 'taient entre les bouais. Y'avait des pliantes tchi 'taient un mio pus grandes au mitan des p'tits gardîns mais les gardîns 'tait s'pathés par des bâsses bordeuses. Les p'tites caûminnes 'taient bâties pus à co par les bords du par et n'y'avait pon dé c'mîns pouor pâsser par les caûminnes souos les bouais. J'avais à crouaîsi les gardîns et faithe souongneusement d's engambées par d'ssus les bordeuses pouor pouver marchi d'un gardîn au préchain pouor aveindre au mitan du par. Lé par 'tait pus grand qu'il avait semblié souos les bouais et ch'tait long, quâsiment eune av'nue auve eune longue mathe tchi sèrpentait par l'mitan du par auve d'la bliête au pouorportant et des c'mîns d'laîze tchi siévaient les bords d'la mathe. Du mitan du par, les caûminnes pathaîssaient hardi p'tites, quâsiment coumme des maîsons à poupettes, et lus bordeuses dé p'tites flieurs coumme des jouéyaux êtrueûlés tout l'tou dg'ieux.

J'fus ravi d'vaie eune crocodile tchi geuthit d'un co à flieur dé l'ieau dans la longue mathe. Épis né v'là d'aut' crocodiles tchi v'naient à la susfache d'la mathe. J'èrmèrtchis qué ches bêtes n'taient pon vraînment des crocodiles mais eune bête coumme eune crocodile auve eune vèrte tête dé hippopotame. J'viyais l'entrée du par au but du c'mîn et né v'là des hardelles à lus pronm'ner dans l'par tchi lus appréchaient d'mé. D'un co ieune des bêtes croco-potames s'dêhalit dé l'ieau et s'mâtit sus l'bord d'la mathe pouor achîtrer eune pathe dé hardelles tchi 'taient à lus pronm'ner là. J'comprîns et viyant la bête sus ses deux pids d'driéthe qué ché n'tait pon dé vrai eune bête mais un hardé dêdgîthé en costeunme. Ch'tait eune trique pouor êffriter les hardelles. I' s'adonnit qu'les propriêtaithes des caûminnes payaient des hardgieaux pouor lus habilyi en croco-potames et nagi dans la mathe et êpeûther les hardelles tchi v'naient au par à seule fîn d'les cârrer des caûminnes et des gardîns.

Rêvé l'15 dé Novembre 2014

 

Viyiz étout:

 

Les Pages Jèrriaises