Les Pages Jèrriaises

Un rêve

J'tais dans eune ville à l'êtrangi - eune vielle pétite ville tch'avait eune églyise întérêssante. J'm'en fus vîsiter l'églyise et quand j'entris dans l'chînm'tchiéthe y'avait de gens bein habilyies mâtées chîn' et là et j'réalîsis qué ch'tait pouor y'aver un mathiage. J'm'appréchis d'la porche pouor haler des portraits d'l'églyise mais y'avait d's hoummes à l'entrée tchi m'dîtent qué la pliaiche pouor les photographièrs 'tait là-bas souos les bouais. Y'avait eune dgaîngue dé monde là-bas driéthe un riban et j'm'en fus là-bas r'garder l'arrivée des mathiés. Et né v'là la cârrosse ès mathiés tch'arrivit par un c'mîn tchi s'sèrpentait l'travèrs du chînm'tchiéthe. La cârrosse vînt au galop halée par deux j'vaux. Les j'vaux 'taient oranges en couleu et i' 'taient quâsiment sauvages et att'lés à r'bours - ch'est en tchi i' couothaient en arriéthe, les têtes enfachant la cârrosse et les tchus à l'avant pouor m'ner la cârrossée. I' galopaient à fîn feu et en faîthant un var à la carre du c'mîn où'est qué j'tais mâté pouor èrgarder la procêssion, les j'vaux freûîtent quâsiment l'riban et la cârrosse 'tait quâsiment pouor êt' renvèrtchie. Mais la procêssion arrivit à l'églyise et tout 'tait mangnifique au solé. Pus tard en ville dans un café ou restaurant j'réalîsis qué j'avais deu m'endormi dans l'chînm'tchiéthe duthant l'arlévée car ch'tait achteu la séthée et j'tais en r'tard - j'avais mantchi l'avion qué j'éthais deu prendre tard l'arlévée. J'éthais à rester acouo eune niet dans l'hôtel et r'boutchi un avion. Mais ché n'tait pon un grand problième.

Rêvé lé 11/10/2016

 

Viyiz étout:

 

Les Pages Jèrriaises