Les Pages Jèrriaises

Un rêve

Ch'tait eune séthée dans un grand gardîn et nou 'tait à danser sus la bliête. Tout l'tou y'avait des bouais et des bordeûthes et des gens assis à r'garder l'spectacl'ye. Y'avait des torches dé tchi les fliambes êcliaithaient la caûde séthée. J'têmes habilyis en vielles hardes en chiquetons, des costeunmes du temps pâssé et coumme jé dansêmes en ronde tout l'tou du gardîn, jé tâchêmes dé happer et gaffer les lotchettes couleuthées des habits d's aut' danseurs dans la gamme. La mûsique jouait un but dé "Terpsichore" d'Miché Praetorius, d'la mûsique d'l'Èrnaîssance. Et nou riait en tâchant d'happer les lotchettes. Ch'tait un tas d'fanne pouor tout l'monde. L's ombres des sounneurs et des danseurs trélûthaient sus la bliête et sus les hautes muthâles du gardîn. Driéthe la carre des muthâles dans eune carre du gardîn d's acteurs présentaient eune pièche dé thiâtre à la lueu des torches et fouées. Des sounneurs jouaient des tambours en fé en forme dé cage dé bouchon d'eune boutelle dé champangne. Ches tambours 'taient grands et nièrs et les sounneurs tapaient sus l'méta pouor faithe tabouothinner.

Rêvé l'11/10/2014

 

Viyiz étout:

 

Les Pages Jèrriaises