Quand j'rassemblyis mes nièrs bagages sus l'train et dêbèrtchis, j'avais laîssi mes deux grandes valises, ou pus à co des baheurs, sus l'baté. J'n'avais pon don chein qu'i' fallait pouor la conféthence. La conféthence 'tait dans eune grande salle. Y'avait des fonctionnaithes et d's êtudgiants d'unnivèrsité, mais n'y'avait pon d'tchaîses. Y'avait des rouoges couôssîns arreunés rédguliéthement dans la salle et i' 'tait d'mêtchi d's'assiéthe déssus et r'garder ls êcrans, pouos les présentâtions tch'avaient 'té r'cordées. J'laîssis mes dôssièrs sus un couôssîn mais j'n'avais pon à m'assiéthe viyant qué j'tais pouor présenter dé tchi.
Y'avait un problième gênant auve la technologie: nou pouvaient pliodgi les câbl'yes, mais quand l'appl'ye înstâllée né trouvait pon d'activité auve les pliogues, ou chèrchait êlectronniquement pouor les câbl'yes et copait la connection.
Eune dgaîngue dé nous laîssîtent la conféthence pouor faithe eune touônnée d'la ville mais eune rue 'tait bliotchie epis lé p'tit tchian couothit par un aut' bord avaû eune longue rue auve des maîsons en brique. Nou m'dit qué nou n'dévthait pon siéthe lé tchian. Mais j'm'en fus souotre (et l's aut's driéthe mé à la fîn). J'pâssînmes eune arche modèrne tchi 'tait un monument au chein tch'avait piloté un avion souos l'arche - nou m'dit dé n'y faithe pon d'attention. Épis à gauche y'avait, à l'entrée d'un entré-deux tchi m'nait dans un bel, un êcritchieau tch'înditchait les deux églyises Irlandaises.
Jé r'gardis dans l'bel tchi 'tait un mio pus êl'vé qu'la rue et les deux églyises Irlandaises 'taient là. À s'nêtre la pus vielle églyise, et la pus grande, tchi 'tait un bâtisse d'Art Nouvé en grise pièrre auve la côtchiéthe comme un tchiâtre ou mûsée ofûche. La deuxième églyise, à dêtre, avait 'té convèrtie d'un p'tit bâtisse îndustrié en brique, eune p'tite mannifactuthe ou storre ofûche, et nou-s'avait înstâllé eune stchulptuthe dé muthâle en pièrre à l'êtage d'la côtchiéthe auve un homme dans un fa (lé propriêtaithe d'la mannifactuthe?) et san nom en grandes lettres.
Rêvé l'3/5/2021
Viyiz étout: