Jé m'râsis la barbe. J'avais eune crîngnache dé corles et jé sembliais bein janne quand j'èrgardis dans l'mitheux.
J'tais dans eune stâtion dé c'mîn d'fé en France, tchique bord au Sud, jé crai. J'laîssis mes bagages sus la pliateforme et j'allis acater un titchet. J'avais un titchet pouor l'restant du viage mais j'avais à acater un titchet pouor Paris. Y'avait eune danme au vitchet du p'tit compteux ès titchets, et eune tcheue d'monde. Quand j'vîns au vitchet, ou mé d'mandit si j'pouvais identifier eune pièche dé sou. Ou dêhalit eune pièche et mé d'mandit si ch'tait eune pièche dé chîn pénîns brétiche. Jé dgettis la pièche et ch'tait un vièr ch'lîn. J'dis qu'ou, chenna valait chîn pénîns. D'vant dé m'vendre man titchet, ou mé d'mandit acouo eune tchestchion: à la siette dé tchi dgèrre tchi spartit un pays en deux qu'un génétha fut médallé? J'n'tais pon bein seux mais j'dis l'Soudan et j'avais raison. La danme 'tait bein rêjouie. Pouor acater man titchet j'avais raîque eune bille dé chent francs: ch'tait eune grande bille auve un portrait d'un auteu du dgiêx-neuvième siècl'ye habilyi en manté et iun des bords d'la bille 'tait quâsiment couèrt par eune boêtée d'texte des êcrituthes dé ch't auteu. J'acatis man titchet, et la machinne à titchets avait un long bras en pliastique et méta tchi s'dêpliyait pouor d'livrer l'titchet împrînmé au but. La danme eut à s'dhaler d'sa câsse et aller prendre lé titchet du but du bras d'la machinne. Jé d'mandis quand tchi qu'i' s'sait, l'train, et sus tchi pliateforme. Ou c'menchit à r'garder l's heuthes des trains mais né v'là l'TGV tch'arrivait sus la pliateforme endrait. J'éthais juste assez d'temps pouor aller ramâsser mes bagages et crouaîsi à l'aut' pliateforme. Y'avait un tas d'monde sus la pliateforme, et chenna auve des soudards.
Rêvé l'9 d'Juilet 2015
Viyiz étout: