Y'avait eune mouontréthie d'cârrosses et eune femme 'tait à nos explyitchi l'histouaithe d'la lait'tie et les gliaiches du temps pâssé. Les laitchièrs soulaient cachi lus cârrosses par les c'mîns à seule fin d'vendre des gliaiches. Les cârrosses à j'vaux 'taient d'luxe, auve lé d'dans en pannieaux d'bouais vèrni auve des tithettes et d's aûmathes et des p'tites armouaithes pouor cont'nîn les gliaiches. Y'avait tant d'bouaîs'sie en d'dans d'la cârrosse qué j'èrgardêmes qu'i' n'y'avait dgéthe assez d'run pouor eune pèrsonne. Lé laitchi 'tait sus l'lief d'la cârrosse pouor cachi lé j'va, ou les j'vaux, épis quand i' s'arrêtait pouor vendre des gliaiches, il ouvrait un vitchet dans l'lief épis aveingnait san bras en bas pouor ouvri eune tithette ou aûmathe ou armouaithe pouor dêhaler la gliaiche chouaîsie.
La femme nos mouontrit coumme tchi qu'un laitchi du temps pâssé l'éthait fait et nos explyitchit qu'la compangnie (jé n'sai pon si ch'tait la lait'tie ou nânnîn) s'n îthait r'întroduithe les cârrosses à gliaiches par les c'mîns, par cause qu'i y'avait eune d'mande pouor.
Épis un janne houmme avait des boutons d'vèrre auve des p'tites veues tch'êcliaithaient d'dans, et i' jongliait atout ches p'tits buts d'vèrre. Mais les boutons, fliantchis et pâssés d'main en main, sembliaient quâsiment fliotter en touônnant. I' bouogeaient douochement et j'viyais coumme tchi qu'les veues blyîntchaient auve des difféthentes belles couleurs. Y'avait un rhythme coumme les veues blyîntchaient et y'avait des difféthentes couleurs dé boutons. Et l'janne houmme nos offrit les boutons pouor jonglier en d'dans d'la cârrosse et les boutons êcliaithaient la tchèrpent'tie des pannieaux en bouais vèrni.
Rêvé l'29/8/2024
Viyiz étout: