J'tais dans un grand appartènment dans iun des pus hauts êtages d'un grand blio. Tout 'tait grée pouor des grandes neuches. Mais n'y'avait fis d'âme dans les salles. Y'avait des tabl'yes grées auve des vaisselles, d'la vèrr'rie et d'la coutell'lie, tout mangnifique arreuné auve des sèrviettes. Sus l's assiettes et les vèrres y'avait d'la décothâtion: des cèrcl'yes dé couleu l'tou des vèrres et par lé bord dé châque assiette en vèrt cliai, vèrt foncé et jaune.
Dans la pus grande salle, y'avait deux longues tabl'yes dé grées lé travèrs d'la salle épis d'aut's tabl'yes sus eune strade ou balcon au driéthe d'la salle. Au but d'la salle la muthâle 'tait eune grande fénêtre tchi s'adonnait sus l'paysage. Auve les banques et les clios, ch'tait des bandes en vèrt cliai, vèrt foncé et jaune, tout comme la décothâtion d's assiettes et des vèrres.
Y'avait achteu das les salle des acteurs et actrices sus des sofas à distchuter comme tchi qu'il' avaient ieu à aver lé pé sus les bras et les gambes râsé pouor des difféthents rôles. Et y'en avait tchi trouvaient qué v'là tchi craîssait du pé pus long et êpais auprès qu'il' eûssent joué des rôles.
Rêvé l'23/9/2022
Viyiz étout: