J'avais à patchi d'vant d'rentrer siez mé. J'avais des m'nues dettes à payi. J'avais à décider tchi faithe auve les pâtchieaux dans la tchuîsinne: les laîssi ou les mangi au run d'aller à un restaurant. Si j'allais mangi à un restaurant, j'éthais-t-i' assez d'temps pouor patcher d'vant tchitter. J'fus à un restaurant auve des anmîns. J'eus à raller à la psote où'est nou-s'avait gardé man pâsseport pouor êt' scanné. Jé m'en fus m'mâter dans la tcheue au but des compteurs, mais un assistant tchi 'tait à b'ser des patchets m'dit d'aller au compteux à l'aut' but d'la salle. Épis ché s'sait d'mêtchi d'aller en ville. J'nos dêhalînmes d'la poste. L'avant à nous sus la falaise y'avait eune partie d'la nouvelle ville (tchi 'tait ancienne auve des muthâles et touothelles. Du haut d'la falaise y'avait l'but d'un pont (tchi soulait êt' un pont dé c'mîn d'fé). J'voulais d'mander iou qu'lé pont soulait m'ner (sans doute à l'aut' bord d'la vallée). L'assistant d'la poste mé m'nit à s'nêtre où'est qu'i' y'avait eune pétite sente, rude et raide, tchi d'valait ava la falaise dé chu côté d'la vallée. J'viyais l'travèrs d'la vallée la vielle ville auve des cliochièrs tchi 'tait jutchie sus un grand haut êta d'rotchi auve des falaises en bas. Lé solé lithait et les bâtisses d'la vielle ville 'taient couleu d'crème. Le muthâles d'la nouvelle ville 'taient pus à co grises. J'couothînmes ava la sente tch'avait des touffets d'hèrbe et des pliantes au pourportant, épis en bas y'avait eune aut' sent pouor ramonter la falaise ès muthâles dé la nouvelle ville.
Rêvé l'4/3/2023
Viyiz étout: