Les Pages Jèrriaises

Des rêves

J'tais à organnîser eune compétition dé châtaines à j'va. Y'avait d's êtchipes dé deux pèrsonnes pouor jouer les gammes dé châtaines à j'va et l's êtchipes lus adonnîtent dans des costeunmes. Y'avait des danmes en costeunme du dgiêx-huitchième siècl'ye, et des gens habilyis en pithate, et d'aut's costeunmes. La compétition 'tait dans un par où'est châque êtchipe avait eune stâlle et nou jouait les gammes souos les bouais. Lé solé lithait.

* * *

Y'avait du hèrtchîn entre les pêtcheurs dé Jèrri et eune dgaîngue dé grôsses chèrvettes. Les chèrvettes, d'la manniéthe tch'avait nom Copédii, vîntent à tèrre à seue fîn d'faithe un protêt. Lé grand cap'taine des Copédii explyitchit qué les pêtcheurs prannaient trop d'la pêque et les chèrvettes dévthaient en aver lus châre à ieux. Si les pêtcheurs n'accordaient pon les d'mandes des chèrvettes, les Copédii dêrout'taient l's engîns des batchieaux. I'n'y'avait pon d'accord et les chèrvettes lus en r'fûtent à la mé. Mais i' s'adonnit qu'il' avaient dêrouté d's engîns d'ouadgîns par les c'mîns. J'tais dans eune rue d'campangne et y'avait un ouadgîn en dêroute tchi bârrait lé c'mîn au trafi sénon pouor les bikes. Y'avait tout un amas d'cyclistes dé pathe à pédaler avaû lé c'mîn du bord laîssi libre par les ouadgîns dêroutés tchi bliotchaient les rues. Ch'tait tout bein, mais mé, j'avais à pédaler d'aut' bord contre lé fliot d'cyclistes et don j'pédalis au pourportant d'la muthâle en allant dans l'aut' direction.

Rêvé l'25 d'Févri 2015

 

Viyiz étout:

 

Les Pages Jèrriaises