Nou 'tait en r'vénant d'Êcôsse et à cachi avaû eune grande route en Angliétèrre. Y'avait des bâtisses au pouorportant et la route avait un amas d'vouaies, ch'tait eune route dé laîze mais ché n'tait pon eune motoroute. Y'avait eune chèrge qu'nou-s'avait à payi au c'menchement d'la route épis y'avait eune règl'ye que l'trafi dévthait garder eune ièrre mouoyenne dé dgiêx-huit pouaint deux milles à l'heuthe - autrément nou veindrait chèrgi un paiement d'extra. Y'avait des veues d'trafi ès carrefours et v'là tchi r'tèrgeait l'trafi et don y'avait eune quédain'nie un co qu'les veues r'touônnaient vèrtes. Pouor ajouôter ès problièmes dé chutte grande route, les piêtons et les boulants 'taient mêlés dans la rue.
Y'avait eune grande bliue vaituthe tch'avanchit trop d'près d'un piêton tchi beurdgit la vaituthe et la vaituthe drissit d'travèrs et y'eut un blio d'trafi. N'y'avait pon d'avâthie mais l'èrtèrgéthie fit mârri des gens et y'eut deux-trais cos d'armes dé tithés (sans faithe dé ma). V'là tch'arrivîtent deux d'mouaîselles dé l'autorité d'la route pouor tcheûter un paiement d'extra dé tout l'monde viyant qu'lé trafi avait 'té r'tèrgi et qu'l'ièrre mouoyenne n'avait pon 'té respectée. Quand i' vîntent à mé, j'lus offrit eune bille d'un louis. I' prîntent la bille et lus cârrîtent pouor un brîn épis r'vîntent pouor dithe qu'eune bille d'un louis n'tait pon acceptabl'ye. J'éthais à payi eune somme dé trais chents louis pouor aver offèrt eune bille tchi n'tait pon vâliabl'ye en Angliétèrre. J'décidis dé n'pon payi les trais chents louis viyant qué ch'tait du niolîn; ieux, il' avaient r'tèrgi l'trafi pus qu'autcheune chose en disputant ma bille.
Rêvé l'7/2/2016
Viyiz étout: