J'tais à vîsiter eune ville et y'avait un tas d'vîsiteurs. J'tais à învestidgi d's êcritchieaux et y'en avait eune grande vâriêté. À l'entrée (ou au mitan) d'la ville y'avait eune grande pièche en bliête et l'tou y'avait des boutiques auve des êcritchieaux sus les d'vanatuthes auve des cliaithes couleurs et y'avait deux-trais êcritchieaux mâtés tempothaithement sus la bliête. Y'avait un fliotchet d'monde à vîsiter les boutiques, ch'tait coumme un grand marchi. Par la carre y'avait eune ruette auve des bârrotîns et d's êcritchieaux d'nom d'rue en difféthentes couleurs driéthe les bârrotîns. J'entrînmes dans eune aubèrge tchi 'tait un restaurant étout. Y'avait un tas d'monde et ch'tait hardi embarrassée. Dans eune carre y'avait un modèle tchi r'présentait chein qu'nou-s'y sèrvait. Y'avait la maîntchi d'eune vèrre dé pînte en pliastique tch'avait 'té spartie à seule fîn d'mouontrer lé cont'nu: y'avait deux couoches, d'la biéthe et du jus d'viande auve d'la graisse. Lé modèle 'tait illeunminné et les litchides bouoillonnaient d'dans. Les couques pâssaient dans l'aubèrge pouor sèrvi l'mangi tchi 'tait rostocomme et jé n'voulais pon gouôter la biéthe à la graisse tchi 'tait la spécialité d'la maîson.
Dans la ville y'avait des plians pouor changi l'entrée d'la stâtion dé c'mîn d'fé tchi s'sait à l'av'nîn eune hèche complyitchie pouor arriver en ville. Ch'tait dé s'pather les vîsiteurs. L'entrée d'la stâtion 'tait souos eune manniéthe dé pont et nou pouvait touônner à drouaite où'est qu'la nouvelle hèche s'sait ou à gauche où'est qu'i' n'y'éthait pon d'hèche. I' sembliait qué ché n's'sait pon nécessithe dé pâsser par la nouvelle hèche proposée entout.
J'touônnis à drouaite et à l'aut' but d'la ville y'avait eune rue et des vîsiteurs et mousses jouaient eune gamme un mio coumme lé cricket dans la rue. La balle 'tait en bouais ou ofûche en liège et nou n'sembliait pon hardi întérêssi dans la gamme mais des vîsiteurs jouaient et jouôtaient la balle ès mousses tch'avaient eune batte en bouais dé tchique sorte. Lé solé lithait mais ch'tait l'heuthe pouor tchitter et les vîsiteurs lus arroutaient douochment pouor lé baté mais nou n's'en allait pon ensembl'ye.
Rêvé l'20/5/2019
Viyiz étout: