Les Pages Jèrriaises

Un Rêve

J'tais à Londres et j'rencontris trais porteurs dé lettres dans la rue à l'entrée d'la cache d'eune grande maîson. Y'avait deux femmes, ieune pus janne qué l'aut', et un houmme. Ches porteurs dé lettres 'taient entchèrfroutchis sus les neuves bikes à poste du Rouoyaume Unni. Ches bikes modèrnes 'taient rouoges cliai et avaient un corps en bârres d'méta bein êpaîsses et vèrtchi en rondes. Châque bike avait raîque eune reue tchi 'tait eune rouoge balle grôsse et ronde coumme un ballon. Ch'tait les preunmié dé ches bikes tchi 'taient pouor êt' faites sèrvi partout l'Rouoyaume Unni par la Poste. Les trais porteurs dé lettres mé dîtent qu'il' avaient à d'livrer à chutte maîson-chîn épis i' m'rattrap'thaient pus liain avaû la rue. I' d'valîtent des bikes et s'en fûtent avaû la cache, tch'avait des bouais coumme eune allée des deux bords. J'm'en fus avaû la rue et les deux porteuses dé lettres m'attrapîtent à pid. I' lus 'taient dêchangies et portaient achteu des longues breunes câsaques. Lé porteux d'lettres, l'houmme, nos rattrapit. I' s'tait dêchangi étout et avait un yi pochi. Il explyitchit qu'il avait ieu du hèrtchîn en d'livrant à la dreine maîson. I' 'tait d'mêtchi d'trouver eune adresse. L'houmme avait eune carte d'la ville, et nou chèrchait pouor un bâtisse tchi 'tait dans des Gardîns. J'têmes à marchi avaû eune grande rue tch'avait un par des deux bords. Ches pars avaient des craûles et d's êcriliades pouor les mousses, et y'avait des fanmil'yes à lus en rêjoui et des gens à lus y pronm'ner dans l'solé. Y'avait hardi d'trafi dans la grande rue. J'dis qué y'avait l'nom des Gardîns qué nou chèrchait sus d's êcritchieaux dans l'par d'not' bord. Mais l'homme mé dit qué ché n'tait pon chenna s'lon la carte. Lé bâtisse dévthait êt' grand et împortant.

Rêvé l'18 dé Févri 2014
 

Viyiz étout:

 

Les Pages Jèrriaises