L'înspecteux Lavthěk d'la police dé Prague 'tait à m'ner eune entchête et j'tais pouor aîdgi à li et san parchonnyi d'police. Mais j'avais à y'arriver et y'avait tant d'trafi sus les grandes routes. Tout l'viage pouor aller en ville par lé bord s'nêtre d'la route y'avait des travaux et d'la bâtithie. Nou crannait des grands pannieaux en chînment tchi pâssaient à un fi près lé c'mîn à bike, v'là tch'oblyigeait les cyclistes à pédaler pus à dêtre, du bord où'est qu'des vielles vaituthes avanchaient douochement, n'ayant pon hardi d'run. Les cacheurs dé vaituthe n'taient pon heutheurs, mais la bâtithie prannait tant d'run sus la grande route qu'i' n'y'avait rein à faithe. Jé d'valis un raide mont par eune ruette pavée dé p'tits galots dé difféthentes couleurs. J'arrivis à un village à mié-c'mîn ava l'mont et à s'nêtre y'avait eune pétite hôtel ou eune aubèrge qué j'connaîssais. Nou faîthait là des r'pathes ès bikes. J'èrgardais souogneusement coumme lé maît' èrgriyait eune bike sus la ruette endrait l'hôtel pa'ce qué y'avait ieu des problièmes auve les r'pathes ichîn d'vant. Nou mînt des bîssas vièdes sus l'pavé pouor s'y'agenouoilli.
Rêvé l'30/10/2018
Viyiz étout: