J'tais dans eune aubèrge tch'avait eune salle dé rêunnions ou d'gammes. Dans la salle y'eut eune bastaude entré les b'veurs et mé j'tchittis la salle pouor rentrer dans l'cabathet. J'pâssais l'compteux quand j'tchis dans l'aithe, assis contré l'compteux en bouais. Y'avait un tapis sus tchi qué j'tais êtrav'lé. J'tais tout êbézoui, mais ch'tait la maladie au run du baithe tch'en 'tait la cause. Des gens vîntent m'aîdgi.
Dans un supèrmarchi, j'voulais acater des chocolats d'Ovaltine mais jé n'pouvais pon trouver l's ais des chucrîns. N'y'avait pon grand monde dans l'supèrmarchi et tout 'tait pathé pouor Noué et nou-s'avait rarreuné la boutique. Jé d'mandis à eune vend'rêsse pouor l's ais des chucrîns. Et ou m'rêponnis qu'i' 'taient là-bas. Mais i' n'taient pon là-bas pa'ce qué chenna avait 'té rarreuné. Ou m'dit qu'les chucrîns dévthaient êt' tchiquebord et s'en fut les qu'si. À la fîn ou trouvit des blianches stalles ou tchiâtres auve des grandes tinnées (rondes et comme eune colonne) dé chocolats d'luxe. Ou n'put pon trouver d'chocolats d'Ovaltine mais ou r'quémandit ches tinnes tchi couôtaient £24.95. Les cont'nus 'taient difféthents et y'avait des difféthents patrons sus les tinnes, épis y'avait des chocolats auve des frits d'dans ou des nouaix auve des êpices, mais châque tinne portait l'même prix. J'pensis qué j'aim'thais bein d'ches chocolats-là et les hautes tinnées valaient bein l'prix.
Rêvé l'18/12/2022
Viyiz étout: