Un rêve

J'travaillais dans eune office en France et nou pâlait Français. Iun des mênagièrs vînt nos pâler; y'en avait trais d'nous dans l'office et i' nos dit qué l'travas d'l'office né 'tait pon bouôn et j'n'avêmes pon fait bein et qué j'têmes comme l'homme tchi voulait êt' un "rebel" mais eu run i' tait comme un "rabble" mais en pâlant Français i' machacrit la prononchiâtion d'ches deux mots Angliais qu'i' sembliaient aver l'même son et don l's aut's clèrcots n'comprannaient pon bein chein qu'i' 'tait à dithe. Mé don tchi comprannait l'Angliais j'tâchis d'lus explyitchi la difféthence entre "rebel" et "rabble".

En r'vénant à la maîson oû'est qu'jé louogeais siez des gens, j'acatis du vîn et eune boutelle dé fronmy, et j'mé d'mandais pouortchi pa'ce qué jé n'savais pon comme tchi qu'j'allais pâsser par la douanne auve les boutelles en rallant siez mé. La fanmil'ye mé dit d'm'assiéthe et d'prendre eune modgie d'thée ès hèrbes. Jé c'menchis d'lus raconter qu'j'avais ieu un rêve en Français entouor un mênagi tchi n'pouvait pon distîndgi deux patholes Angliaîches, mais d'un co j'aheuqu'tis quand j'vis comme eune colonne dé feunmée auve des reues d'dans pâsser la f'nêt' d'eune ièrre. Jé n'savais pon tch'est qu'ch'tait. Nou mé d'mandit tch'est qu'i' y'avait et j'dis qué ch'tait un ouadgîn tch'avait soûfflié. J'nos dêhalînmes dans la rue et r'gardînmes dans l'vaîthinné où'est qu'un înmeubl'ye - un grand blio - sembliait damagi. Y'avait d'la feunmée et i' sembliait qu'lé ouadgîn avait volé en l'air et croch'té l'înmeubl'ye. Mais l'monde 'taient êtrangement calmes pouor eune si grand avâthie. J'rentrînmes dans la tchuîsinne et nou mé d'mandit pouor chein qu'j'avais veu l'travèrs d'la f'nêt. Et j'explyitchis qué ch'tait comme si nou-s'avait lanchi un ouadgîn par l'air auve eune grande forche et qu'j'avais veu d'la machinn'nie tchi touônnait dans la feunmée. J'tais bein gêné et nou m'pâssit ma modgie d'thée ès hèrbes tchi n'tait pon fort entout. Nou r'mèrtchit qu'lé thée 'tait fraid achteu mais j'en bus tout comme et nou dit qué ch'tait probabliément calmant.

Rêvé l'20/1/2010