Mangi du ch'va! Ne v'la chein qui' faut faithe,
Bouoill'yi longtemps une bédache de bidet
Sur un gros feu, dans la plus grand' chaudiéthe,
Pour san dîner! Tch'est qu'èprouv'tha d'itèt?

Vraîment ch'est du' d'penser qu'la pouorre Lizette
Qu'nous a cachi pour devièr vingt-chinq ans,
Es'sa bétôt, en steak sus votre assiette.
Ch'est trop d'mander à des hommes de bouan sens.

Quand nou s'entr'dit, tchic fais, l'estoma' vièdde:
"Je mang'geais bein un ch'va, la graie au co"
I'n'faut pas craithe qu'i' n'y'a pon d'autres ermièdde
Pour l'appétit, que d'faithe un tè fricot.

J'aime occouo mus teurtre l'co à mes glinnes,
Faithe de la soupe avec du lard salè,
Et êtuiver la dernièth' d'mes lapines.
Mais je n'veurs pas mangi man vier bidet.

Elie