Les Pages Jèrriaises

Un rêve



I' m'sembliait qué j'tais eune actrice, preunmiéthement dans un vièr appartément où'est qu'nou jouait eune pièche à la lueu d'chandelles. Les muthâles d'l'appartément 'tait couvèrtes dé bouais peint, y'avait des changlièrs et des meubl'yes bein anciens - des grand'tchaîses et eune longue tchaîse sus tchi les deux'trais membres dé l'audienche 'taient assis. Chenna pouôrrait êt' au dgiêx-huitième siècl'ye dans eune grand' maîson, mais i' m'sembliait qué ch'tait modèrne.

J'tais à êprouver à aller jouer man rôle dans la pièche, mais man côtillon souos lé grand fro à crinolinne tchiyait, j'trébutchais et j'rouôlais dans l'aithe, enfliubé dans ches vièrs habits êtreingnants, dans l'appartément vaîsîn.

Épis, j'tais à marchi par les rues dé Dublîn, mais pas un Dublîn qué j'èrconnaîssais. Chutte fais tout 'tait bein modèrne. I'm'fallait trouver l'thiâtre d'l'Abbaye (Abbey Theatre) pouor eune audition, mais j'avais laîssi l'adresse tchique bord, et j'êprouvais à trouver un téléphône pouor pouver app'ler au thiâtre â seule fîn d'les asseûther qué j'arriv'thais pus tard l'arlévée.

Les rues dé Dublîn 'tait compliètement patchies d'monde et i' tait bein dû d'avanchi.

Geraint Jennings
14/1/2003
 

Viyiz étout:

 

Les Pages Jèrriaises