Les Pages Jèrriaises

Un Rêve

Sus un mont, eune rouoge vaituthe 'tait partchie dans la route, enfachant la Ville. Y'avait des bouais des deux bords d'la route et v'là tchi r'sembliait au Bieaumont. Dans la vaituthe, un gorille 'tait assis. Lé gorille 'tait dangétheux, mais paisibl'ye pouor achteu. Mé j'tais êtrav'lé sus l'trottouaithe un mio en driéthe d'la vaituthe et j'tâchais dé n'pon m'faithe èrmèrtchi. Jé n'voulais pon faithe mârri l'gorille.

Pus tard, y'avait un tas d'vaituthes arrêtées sus l'mont driéthe lé gorille, car la rouoge vaituthe 'tait à bliotchi la rue et nou n'pouvait pon pâsser sans gêner l'gorille.. Mé, j'tais à explyitchi la situâtion à des Polonnais. J'tâchais d'pâler un mio d'Polonnais, mais y'avait trop d'Russe là d'dans et j'rêprouvis atout du Tchèque. Tout coumme iun des Polonnais m'fit un complyiment pouor man Polonnais.

Geraint Jennings
254/2010

 

Viyiz étout:

 

Les Pages Jèrriaises