Les Pages Jèrriaises

Un rêve

Y'avait un parti à la faichon d's années 1920s: les femmes portaient des courtes cotelles et l's hoummes 'taient habilyis en néthe câsaques à coue d'héthonde. La salle 'tait tchaque auve un fliotchet d'monde. En d'houors y'avait un par ou un hardi grand gradîn tchi d'valait à pèrte dé veue. Y'avait eune grande êtendue d'bliête et des bouais à l'entou au liain. J'têmes sus eune sîl'ye tchi s'adonnait sus l'par ou l'gardîn. Lé solé lithait et y'avait deux longues rangies d'hoummes à danser dans lus câsaques à coue d'héthonde et lus tappeurs et y'en avait tch'avait des manniéthes dé cravates en souaie en difféthentes couleurs amathées l'tou d'la tâle. Les deux rangies d'danseurs lus entré-fachaient. Et tchiqu's'uns des danseurs sautaient en l'air et lus r'touônnaient deux-trais fais en l'air coumme s'i' dgêpaient ou fliottaient sans gravité d'vant d'èrmett' pid dans l'aithe. Et i' sautaient d'même chîn' et là sans qué j'pûsse comprendre les règl'yes d'la danse.

Rêvé l'25/8/2018

 

Viyiz étout:

 

Les Pages Jèrriaises