J'tais dans eune vielle tchuîsinne dé fèrme; l'aithe 'tait en tèrre battue, et 'tout 'tait mal êcliaithi et pus à co pons'leux. Au mitan d'l'appartènement y'avait eune vielle tabl'ye en bouais. Souos la tabl'ye y'avait eune bachinnée dg'ieau. Lé bachîn lithait coumme si y'avait des chandelles dans la tchuîsinne. Souos la tabl'ye y'avait étout eune hardi grande tortue, quâsiment aussi grande qué l'bachîn.
Y'avait euen dgaîngue dé gens à l'aut' bord d'la tchuîsinne. Ch'tait eune bordée d'tchique sorte. Nou mé d'mandait d'tchi manniéthe qu'ou 'tait la tortue. Ch'est en tchi ché n'tait pon la même manniéthe qué l's aut's tortues qué nous soulait garder. Ches-là avaient un artchet sus l'haut d'lus cruques, mais chette tortue-chîn n'en avait pon. Sa cruque 'tait pus sîmpl'ye et pus rédguliéthe.
La tortue s'arroutit douochement dé d'ssouos la tabl'ye. Ou mînt un dgéthet dans la bachinnée dg'ieau mais mans renvèrtchant l'bachîn ni êtrueûlant dé l'ieau. Ou marchait bein souongneusement et à la fîn s'en fut parmi les gambes des gens mâtés l'tou d'la tabl'ye.
Rêvé l'18/8/2020
Viyiz étout: