En viageant j'vînmes à eune belle hôtel et j'nos r'pôsînmes dans eune chambre pouor l'arlévée auve lîntention d'mangi dans l'restaurant tchi 'tait en bouais auve eune veue sus la rue. J'décidînmes dé rester la niet et d'chouaîsi des pus grandes et confortabl'yes chambres. Et don j'dêpatchînmes. Y'avait un houmme dans l'hôtel tchi 'tait malheutheux. Au mitan d'l'hôtel y'avait un bel et ès êtages y'avait des gal'lies ou allées ouèrtes auve les portes ès chambres et nou pouvait r'garder en bas dans l'bel où'est qu'y'avait des marmoûsieaux coumme dans eune mênag'gie. Les marmoûsieaux 'taient grands et gris, un mio coumme des babouîns. Lé moussieu malheutheux halit ses habits. En r'gardant dans l'bel jé l'êpyis là-bas aggroufflié tout nu parmi les marmoûsieaux. Jé n'pouvait pon dithe s'i' 'tait êvilyi ou malade, mais les marmoûsieux 'taient aggrouffliés dans l'bel sans l'èrmèrtchi du tout. J'criyais qu'nou dévthait aîdgi au moussieu s'i' 'tait malade ou au mains dgèrni la direction d'l'hôtel qu'iun des vîsiteurs 'tait dans l'bel ès marmoûsieux. Jé d'valis en bas et j'trouvis l'gardgien tch'avait eune grande brînge atout tchi qu'i' 'tait à peindre les muthâles d'l'allée d'sèrvice en nièr. Ch't' allée 'tait remplyie d'bataclian et 'tait sale et la néthe peintuthe d'gouttait partout. Lé gardgien dit qu'il avait un fûsi trantchilîsant pouor tither l'houmme à seule fîn qu'nou pûsse lé transporter à l'hôpita. Il ouvrit eune armouaithe. Jé n'tais pon pèrsuadé qu'i' 'tait d'mêtchi d'tither l'houmme atout eune èrchelle trantchilîsante mais ché n'tait pon man d'vé.
Rêvé l'26/8/2018
Viyiz étout: