La s'maine passée, j'attrapis l'Chef dans iun d'ses bouans moments et j'li d'mandis si ch'est que j'pouvais aller ès Courses à St. Brelade. A man grand êtonnement, i' m'dit: "Oui-dgia, man vyi, mais ergarde à té, car i' pathait qu'il est arrivé dans l'île un tas d'voyous et d'reintchivailles qui ramassent lus vies par embliûter et voler des innouothents comme té."
“Oh, n'vos génez pas d'chutte partie-là!" j'li réponnis. "J'n'sis pon né d'aujourd'aniet, et j'voudrais bein vaie l'individu qui pouvait m'haler des vers du nez!”
“Tout ch'là est bein bon, qu'i' m'dit, mais prends m'n avis et n'emporte pas trop d'sous.”
“Trop d'sous? Eh bien, l'affaithe est belle - et d'où est que j'les pêquethais?"
Par un coup d'chance, ma femme Marie 'tait horte à la campagne, et comme jé counnais le niche où est qu'ou muche tréjous la clié du côffre-fort, je fis en sorte pour prendre possession du cont'nu, i'y avait justement treis louis seize ch'lins, et cache! Mé v'là aller à St. Brelade.
'Ous pâlez d'monde! J'crai quâsi que tout Jèrri y était. Comme 'ous savez, j'sis d'la maintchi trop connu et trop populaithe pour aller à ches pliaiches-là, et partout ch'tait: "Salut, man vyi, comment qu'tu es? Vint-en bethe eune fais!"
Des invitâtions comme chenna m'allaient bien pour un temps, mais auprès que j'avais bu sept ou huit pintes de bièthe - et treis ou quatre p'tits lermins d'ieau d'vie - je c'menchis à vaie tout qui touannait.
Auprès m'être erposé pour enne derni'heuthe sous eune touffe de jon, je me r'sentis un mio mus. Je m'trouvis l'long d'un moussieu qui v'nait justement d'poser un paraplyie ouvert sus la mielle, et il êtendit treis cartes d'sus. "Cherchiz la femme" i' m' dit.
Je li dis que j'sis mathié et que si par malheu Marie me trouvait à cherchi des femmes, i'y éthait du biaton au Numetho Treis, Rue des Vignes. Ch'est que j'n'avais pas justement saisi l'idée d'la chose; ch'tait la Dame de Tchoeur qu'i' fallait trouver.
L'affaithe 'tait cliaithe comme le jour. La Dame 'tait la sienne du mitan, et j'en dis autant. "Eh bein, i'm' dit. M'ttez un louis d'sus, et si ch'est lyi, je r'doubliethai vos sous!"
Je n'me fis pon prier deux fais, par exempl'ye! je dêhalis iune des billes à Marie, et j'la fliantchis d'sus. “Touânez la” qu'i' m' dit.
Je la touânis, et sav'ous bein que ch'n'tait pas la Dame du tout, mais le maudit deux d'cârreaux! Je m'en allais erlever man louis pour erêprouver eune aut' feis, mais i' l'avait déjà fouorré dans sa pouchette. A chu moment-là, lè Chant'nyi Frainque Le Rossingno l'empoignit par lé collet et l'emm'nit en bouaite, paraplyie, cartes et toute la pêque, et man louis par dessus l'marchi!
Auprès ch'na, je m'en fus pus liain, et je trouvis eune dgaingue de monde alentou d'eune tabl'ye eyou qu'un homme touonnait eune grande adgule sus un drap, sus tchi qu'i'y avait des portraits de j'vaux, des rouoges et des bliancs. "Ah' j'pensis, ch'est simpl'ye comme A.B.C. chennechîn".
Et je déhalis eune bille et la cliuttis sus un blianc j'va. L'adgule touonnit et touonnit - et s'arrêtit sus un rouoge, et dans un clyin d'yi ma bille avait dispathu! Mais je n'perdis pon couothage pour autant. Je r'pique ma derniethe bille sus un rouoge - oh, si Marie m'avait veu! et dans un instant man treisième louis 'tait hors auvec les aut's!
Longuetemps d'vant chenna, j'avais mins dgiex ch'lins sus un j'va que nou m'avait dit qu'était seu d'gangni, mais pour tchique raison i' n' vint que quatrième, et auvec les m'nus débours que j'avais faits, i' n'me restait que ching sous. Tout chein que j'avais à rapporter en ville était la coconette que j'avais réussi à déplianter.
A la tumbée d'la niet, je fus trouvé auprès d'la station d'Don Bridge à plieuther à fraides lermes, et un moussieu qui me r'connut, me rapportit en ville dans sans moto.
Ne m'pâlez pas d'autre de Courses, par exempl'ye! Chein qui m'gêne le pus, ch'est quand Marie s'en va rev'nîn d'la campagne demain et qu'ou s'en va ouvri le coffre-fort!
I' s'en va y en aver, du propre!
Viyiz étout: