J'avais 'té à un parti où'est qu'nou m'avait prîns lé cont'nu d'mes pouchettes pouor garder, coumme i' dîtent, man porte-bille, mes cliés et tout chenna en seûth'té. Du parti j'feûnmes pèrsuadés d'aller à eune ville pouor continnuer la bordée, mais nou nos laîssit là-bas dans des appartènements au mitan dé p'tites ruettes. Auprès un brîn j'voulais tchitter viyant qu'j'avais un appouaintement l'matîn mais i' 'tait d'mêtchi d'r'aver man porte-bille auve mes sou. J'm'en fus par les c'mîns tchi vithevardaient par dédans souos les bâtisses et entre les maîsons. Y'avait des muthâles peintes en jaune. J'décidis d'porter pliainte à la stâtion d'police en pensant qué si ch'tait tchestchion d'entchête d'la police nou m'èrdonn'nait man porte-bille auve mes cartes. Mais quand jé d'mandis ès gens par les c'mîns où'est qu'la stâtion d'police 'tait dans chutte ville-là, i' n'voulaient pon m'rêpondre. À la fîn j'pâssis par eune porte et d'valis dans un par auve des bouais et des veues et des gens sus la bliête et les sentes tchi crouaîsaient l'par. Ch'tait tout bein bé à la r'vèrdie. Et au mitan du p'tit par y'avait un bâtisse, pon bein grand, auve eune montée d'laîze l'avant à l'entrée. Mais ché n'tait pon eune stâtion d'police, ch'tait eune gendarméthie Française auve des couleurs Françaises, et les gens là l'tou pâlaient Français. La gendarméthie n'pouvait pon m'aîdgi viyant qué ch'tait eune affaithe d'la ville et nou n'apportait pon les choses pèrdues à la gendarméthie. J'èrfus en ville et nou m'mouontrit eune porte muchie pouor tchitter la ville, mais driéthe la porte y'avait raîque acouo d's allées et des portes.
Rêvé l'23/6/2018
Viyiz étout: