Y'avait un docteu et sa parchonniéthe êtrav'lés sus eune longue tchaîse sus un véranda en d'houors d'eune maîson. Y'avait deux êtages à la maîson et l'véranda allait l'tou d'la maîson ès bas et à haut. Y'avait des plianches et des bas nou pouvait r'garder en haut et vaie un mio entre les plianches du véranda d'à haut. Ch'tait la niet et i' faîthait caud. Mé j'tais l'docteu et ma parchonniéthe au ras d'mé m'dit qu'i' y'avait tchitchun tchi marchait sus l'véranda au d'ssus d'nous. J'dis qu'nânnîn, i' n'y'avait fis d'âme, mais j'èrgardis et j'vis qu'i' y'avait des soulièrs tchi bliotchait la leunmiéthe entre les plianches au d'ssus d'nous. N'y'avait pon d'brit.
Par dédans la maîson dans l'allée des bas, y'avait tchitchun tch'avait entré dans la maîson. I' 'tait à chèrfouoilli pouor tchiquechose. Si ch'tait un voleux, jé n'savais pon. I' 'tai habilyi en nièr. J'têmes dans la tchuîsinne et pouor chasser l'întrus, j'lî fouotînmes d'la batt'tie d'tchuîsinne et chenna auve des câssetroles et sâsse-paines. Ieune des câssetrôles bûchit quand nou l'adèrchit atout; v'là tchi s'acrépuchonnit quand ou tapit l'întrus. L'întrus s'en fut.
J'avais à viagi à Moscou mais j'n'avais pon patchi d'valise et tout chein qué j'pouvais faithe dévant l'départ 'tait d'trouver des habits dans l'armouaithe à Boris Johnson tchi n'tait pon là. Y'avait un tas d'blianches quémînses hardi formelles, mais n'y'ait pon assez d'lînge dé corps. Si jé n'pâssais pon l'examinnâtion j'éthais à r'aller à l'êcole pouor deux tèrmes. Y'avait eune vîsite dgidée. Nou 'tait dans eune grande salle et y'avait eune réception auve un tas à baithe et à mangi. Les gens 'taient attînfées dardi bein, et nou mé d'mandit d'faithe un discours sus l'art Letton. Jé n'tais pon gêné viyant qué j'criyais pouver l'explyitchi assez pouor les gens tchi 'taient là.
Rêvé l'21/11/2022
Viyiz étout: