Certain pasteur, prédicateur -
- Mais seulement en amateur -
Allait au vraic au bord du Hocq;
Faut ben êtout qué gens si saints
Graissent lus herbe coumme les mondains;
Un' houmme n'en est pon mains dévot -
Quoiqu' jé n'sait pon si gens si bons
Trouv'ent mus qué d'autres lé vraic l'pus long!
Enfin not' apôtre et son estchippage
Taillyiaient dé l'engrais pour lé maînage.
(Ch'est seûre t'chi s'dounnaient pus dé peinne
Qué cheux t'chi ramassent
Et entassent
Du bann'lais dé fielles pour gérémienne).
Dévant dé d'valer au rotchi
Lé révérend avait louôgi
Dans l'estable
D'un vaisin affable
San ch'va pour t'ch'y fusse à l'abri;
Et lé domestique dé la maison -
- Sans contrédit, un bouan garçon -
Soignait qué la bête eusse à mangi,
Et fusse ben ammarée pour né s'abannouner pon.
Là-bas, not' réligieux taillyiait, taillyiait;
Tout en taillyiant y ruminait
Choses et autres; du nouvé pour un sermont,
Ou coumment gâgni s'n'eslection,
T'chique malice pour enl'ver des voiaies
A l'autrc parti sans faithe dé frais; -
Ou ben ermettait dans sa mémoithe
Dé douôches paroles pour unn' prièthe,
Pour faire les pécheurs aller s'assièthe
Coumme l'i, convertis dans lé Grand Banc!
Pis, dans un saut y tirait au blianc,
Pensait faithe "bull's eye!" pour y gâgni
T'chique fusi d'chasse ou encriyi!...
Et l'y prennait lé bari pour bêthe unn fais;
Songeait à la bouanne litcheu dé tren'trais!
En vl'à t'y un mêlange dé "faits divers"?
Y'm semble vos vais en escaler l'syiers;
Pourtant not' chrêtien fait profession
Dé mêler politique ov réligion!
Politique dé cabaret,
Farces, tromp'ries et ch' en qu' en sied;
Réligion par intérêt,
Un Tartuffe fini, ou à peu près -
T'chi fausse réligion! T'chi fausse politique!
T'chi huile et iau dans la maîme barrique!
Ervénons au Hocq. Ch'est la traisième mathée,
Au vraie lé prêtre a fait sa bordée;
Tout drait à l'estable l'Evangéliste s'en va,
Et qu'menche bouannement à att'ler san ch'va,
L'y met, bouârré, âtelles, sellot,
Mais jâmmais né put trouver d'bridot!
Lé domestique dé la maison,
- Coumme j'vos l'ai dit, un bouan garçon
Fâssit dans l'temps - not' débiteux d'sermons,
Dans sa gêne l'y criyit tout' sortes dé noms:
"Jacques! Paul! Pierre! oûqu'est man bridot?
Jé n'peux lé trouver! " - L'autre dévant dithe mot
Tend la main au prêcheux,
L' ergardit d'un air sérieux,
Et pis t'y dit: " Vous me devez un chelin pour avait logé
Votre cheval ici, - je veux être payé" -
Lé ministre (dé s'conde main) fut pitchi la d'près
- Fit minne dé cherchi dans sa pouchette dé braies,
Dé veste et dé jacket: y n'y avait que du ponsi!
- T'ch'est qu'on voulez d'un corps t'chi n'est pon "au fonci?"
V'la don moussieu lé pieux ben drollement prins;
Pas dé bridot et... pas dé chelins!...
Et l'autre tchi né voulait pon l'y faithe crédit,
Mais tendait tréjous la main pour être payi!
"Ce n'est pas ma faute, monsieur, si votre bourse est vide,
Prenez donc votre cheval, mais vous n'aurez pas de bride!"
Triste prédicament pour un prédicateur
T'chi dé brébis errantes voudrait être lé pasteur!
Yeun qué nou-z-a veu es assembliaies dé prièthe
Ov' un boutchet dé flieurs dans sa boutonnièthe!
Ses qu'veux ben huilès, ses oisqueurs raccourchis
Dévotion faite à s'enn'aise, sus un couôssin assis;
Mais "Pas de chelin, pas dé bridot"
Ch'tait là du gars lé dergni mot!...
Mé, qu'étais là, quand jé vit
Qué l'affaire en vindrait en brit,
Et qué not' local, ambulant,
S'en allait partout, cherchant,
Mais, ma fingre sans en trouver
Un bridot à emprunter;
T'chil' allait dé rue en rue
Cherchi police - jé n'pu pus
En escouter d'autre; nos gens mé criyaient,
Et maûgré mé j'enn put pas vais
La fin d'la scêne, mais justément
J'l'y dis deux mots en sortant d'là: -
"Pasteur, ta langue, sans bride, marche ben souvent,
Fais-y ach'teu marchi tan ch'va!"
J.P.
|
