Les Pages Jèrriaises

Un rêve

J'tais à vîsiter eune fèrme tchi 'tait à mié-c'mîn amont un mont. Y'avait eune rue tchi d'valait l'mont tchi pâssait l'us d'la fèrme. I' faîthait bé, mais la rue 'tait à l'ombre des bouais au pouorportant d'la rue. Y'avait eune calenge chu jour-là: eune course à corps nu et nueus-pids pouor la charité. Preunmiéthement j'vis pâsser l's hoummes tchi couothaient ava l'mont à pliate couôtuthe et touos nus en muchant lus parties atout lus mains. Auprès un brîn ch'fut l'tou ès collégiens tch'arrivîtent en un grand fliotchet en pyjamas. Y'en avait tant qu'i' n'pouvaient pon couôrre à la fais ava l'mont et y'avait eune manniéthe dé tchueue pouor pouver lus arrouter en couothant. Mé, j'décidis d'couôrre étout auprés qu'la mâjorité des collégiens eûssent pâssé. Mais jé n'voulais pon couôrre ava l'mont souotre lé restant dg'ieux épis jusqu'à la fîn d'la course. Au run, j'couothis amont l'mont auve l'întention d'aveindre lé haut du mont, tchi n'tait pon liain, épis r'dévaler à la fèrme. J'tais habilyi en nièr.

Rêvé l'31/12/2018
 

Viyiz étout:

 

Les Pages Jèrriaises