Les Pages Jèrriaises

Un rêve

Y'avait eune compétition dé mûsique et d'gŷmnastique dans eune grande salle. Les juges 'taient assis à un but d'la salle et les compétiteurs avaient à c'menchi lus présentâtion d'l'aut' but d'la salle où'est qu'ou 'tait l'audienche. Nou-s'avanchait en faîthant d'la gŷmnastique ou d'l'athlétique, tchique mouvement dé sport ofûche, épis nou présentait sa mûsique l'avant ès juges. Lé miyeu compétiteu 'tait un janne houmme tchi fit un mangnifique saut à la vaûle. Atout sa vaûle i' sautit bein haut, quâsiment au pliafond d'la salle, épis vînt à tèrre à pliate mague bi-dé-ramme ès pids des juges et d'siette, quâsiment d'un mouvement, i' poussit sus l'bouton d'sa machinne à mûsique à sa dêtre et c'menchit à chanter sans êt' êssoûfflié en tout. Tout 'tait fait auve d'la grâce et d'la charme et d'la précision et l'audienche en 'tait êmèrvilyie.

Août 2014
 

Viyiz étout:

 

Les Pages Jèrriaises