J'tais dans un par à Prague. Ch'tait l'Hivé et y'avait eune pétite sente tchi d'valait un mont dans l'par. J'pâssis deux hoummes tch'amontaient la sente. La sente dévînt hardi raide et y'avait un tas d'pité et la sente 'tait bein drisseuse - eune êcriliade entré des ronds rotchièrs. Jé drissis ava dans l'pité et un mio pus bas y'avait d'la né. Jé m'trouvis embourbélé et quand j'dêhalis mes pids dé d'dans la né et l'pité, j'avais pèrdu mes bottes. Auprès tchiques engambées ava j'èrvîns ramâsser mes bottes. J'èrmIns les bottes et j'continnuis et j'arrivis bétôt en bas du mont dans l'par et y'avait eune êtchipe dé télévision Tchèque tchi faîthaient d's entréveues auve des gens entouor lé ski. Ieune des grandes skierêsses d'l'êtchipe nâtionnale Tchèque avait pèrdu ses bottes. Mé j'dis qué j'n'avais pon veu les bottes d'la skierêsse mais ché n'tait pon en tout ravissant viyant qu'la tèrre 'tait pit'leuse. Nou m'èrdémandit mais j'èrdis qué jé n'savais rein entouor les bottes épis j'réalîsis qué les bottes qué j'avais r'mîns sus mes pids 'tait trop grandes et trop confortabl'yes. J'dêlachis mes bottes et ch'tait des grandes bottes en breune pé, bein douoche, et en d'dans né v'là-t-i' pon mes bottes pit'leuses acouo sus mes pids. Jé m'extchûthis et r'donnis ses bottes à la blionde skierêsse tchi 'tait là auve sén ensîgnant. Ou sembliait bein heutheuse dé r'aver ses bottes. Pus tard j'tais dans un appartènement qu'nou 'tait à r'graie. Nou rempliaichait les tuiles sus les muthâles d'la tchuîsinne et r'pap'sait. Y'avait toute eune êtchipe à y travailli et y'avait un bouffon en chèrge, mais nou changeait d'bouffon bein rédguliéthement et châque bouffon avait ses idées difféthentes.
Rêvé l'13/1/2016
Viyiz étout: