J'entrînmes dans eune aubèrge et j'têmes eune grande dgaîngue dé monde prête pouor eune fête. Mais n'y'avait pon d'run et j'feûnmes oblyigis d'nos attablier entre des pathais, mais les boêtées d'boutelles dé vîn qu'nou-s'avait apporté pouor la fête taient tâssées sus les bancs l'tou d'la tabl'ye contre la muthâle et jé n'pouvêmes pon nos assiéthe.
L'aubèrgiste nos mouôntrit un vitchet dans l'pliafond et j'grîmpînmes l'iun driéthe l'aut' par l'vitchet dans eune p'tite tonnelle souos l'lief et j'crapaûdînmes avaû la p'tite tonnelle tchi touônnait et j'nos dêhalînmes dans eune grande salle muchie à haut tchi 'tait toute grée pouor eune fête auve des longues tabl'yes, des bancs et des décothâtions. Au but d'la salle y'avait un cabathet auve des pompes pouor du cidre et d'la biéthe. Les f'nêt's 'taient couèrtes à seule fîn d'muchi la salle dé d'houors. J'têmes bein heutheurs.
Pus tard j'tais dane eune ville où'est qu'nou 'tait pouor aver eune pathade. Jé n'sai pon si ch'tait la même célébrâtion. La grande route d'la ville avait hardi d'laîze et y'avait un canné dé châque bord entré les trottouaithes et l'pavé du mitan. Y'avait un 'té fliotchet d'monde qué, driéthe nous et les grôsses têtes, la police bliotchîtent la rue. Eune lîngne dé policemainnes empêchit ès gens d'avanchi en mâsse et il' avaient à crouaîsi les cannieaux des deux bords et d'pâsser en p'tites lîngnes. Un tas d'monde décidîtent dé touônner amont l'mont à gauche et prendre eune aut' quémîn. La police avait d'même contrôlé l'afflioqu'thie d'la pathade et nou-s'avanchait en seûth'té. La rue 'tait drissante par cause d'la né et nou dit au chef dé police qué v'là tch'èrtèrgéthait l'monde d'èrvénín et i' fut un mio ravi mais accordit.
Rêvé l'31/3/2019
Viyiz étout: