Eune autre surprinse étout y'avait!
Quand Papa vint pour dêjuner,
Eune belle p'tite selle i' m'apporti
Qu' était parfaite sus man ponin!

La bête et mé j'soummes touos heutheux
Et pratitchons bein du les deux;
I' saute tout franc par sus l'canné
Quand j'gallopons au bas du pré.

Et tchique fais pour m'êtibotchi
Sus deux pattes il est tout drêtchi;
Ch'n'est vraiment pas pour mé tchulbuter,
Ch'n'est qu'eune p'tite gamme tch'il aime a jouer.

Il est fidèle et intelligent
Et comprend tout mot de c'mandement
Je crai tchi voudrait s'êdutchi
Car à l'école i' s'présentit.

Je vénions d'entrer dans la classe,
Et l'maître nos addréchait la pathole
Quand subitement, je ouîmes hignyi
Et à la f'nêtre j'vîmes man ponîn.

La prièthe et l'cantique finis,
Le ponîn dans la classe entri:
Sus chut sujet j'eûmes eune leçon,
T'chi pliut à tous coumme de raison.

J'espéthe tchi viv'tha pour tréjous
Car j'aime san caractèthe si doux;
J'lis donne tout cha qui y'a d'miyeu
Car i' m'passe si près du tchoeu.

F. M. H.