Les Pages Jèrriaises

Un rêve

J'tais en France. J'tais à marchi l'travèrs d'la campangne par eune sente en blianc gravi bordée d'bouais. Lé solé lithait. J'arrivis à un village tch'avait nom "Colonopole" - lé nom 'tait en grandes lettres sus un grand êcritchieau dans la grande rue du village. Y'avait au mains chîn-s-hôtels dans la grande rue du village, tchi 'tait la "capitale" des "colonnies d'vacanches" à l'entou. J'continnuis avaû la sente mais auprès tchique engambées j'èrbroussis c'mîn et j'allis r'garder la boutique dans la grande rue du village. La rue montait ès hôtels et la boutique 'tait au bas d'eune montée en pièrre pouor les piêtons à la carre du carrefour au mitan du p'tit village. Les rues 'taient en blianc gravi étout. L'êtalage d'la boutique 'tait d'la vielle faichon et i' n'y'avait pon d'veues êlectriques dans la d'vantuthe. Y'avait du monde à r'garder les marchandises êtalées sus d's ais entre les vèrtes colonnes d'la d'vantuthe. Y'avait des pâtich'chies ès tchoeurs êglianmés, et du savon à tchoeur. Y'avait des parfums et des savons d'la vielle faichon. Y'avait d'tchi parfunmé à la rose. Mé j'tais pouor acater du savon. Y'avait des porte-vouaix sus les muthâles et les noms d'tchiques jannes militaithes fûdrent annonchis. Les soudards fûdrent sommés à eune rêunnion et i' lus trînmoussîdrent amont la montée du bord d'la boutique. Coumme i' pâssaient, j'les ouïyais lus entr'-démander pouortchi qu'nou l's avait sommé.

Rêvé l'30 Dézembre 2013
 

Viyiz étout:

 

Les Pages Jèrriaises