Nou nos avait bailli des titchets pouor un clobe dé niet. Ch'tait pouor eune séthée bein formelle, tchique célébrâtion. Tout l'monde 'taient habilyis en nièr - l's hoummes en nièrs fas auve des tappeurs et les femmes en courts nièrs fros. L'êffet 'tait qu'nou-s'allait à un rêvillon d'entèrrement. La tcheue pouor entrer dans l'clobe s'êtrueûlait jusqu'à la Rue du Va. I' 'tait acouo jour et nou 'tait tchaquenardé dans la rue. J'voulêmes payi pouor nos titchets mais nou r'fûsit d'prendre nos sou. Dans la rue, j'tâchêmes d'explyitchi ès vielles gens eune nouvelle chanson populaithe chantée par eune janne chant'rêsse. Quand j'entrînmes à la fîn dans l'clobe dé niet en Ville, nou 'tait acouo à graie la séthée. Y'avait quat' cabathets - l'pus grand cabathet 'taut aupi d'l'aithe à danser. J'têmes dans un cabathet à l'êtage tch'avait d's oranges tapis. Nou 'tait à travailli driéthe lé compteux du cabathet auve des boutchets. J'têmes assis dans l'cabathet sus des bancs tchi 'taient oranges étout. Eune chanson c'menchit à jouer. Ch'tait la chânson populaithe qué j'avêmes explyitchi ès vielles gens, mais chantée bein pus douochement par eune aut' dgaîngue. Ch'tait hardi pliaîthante, mais les vielles gens n'pouvaient pon r'connaître ni comprendre la chanson.
Rêvé l'17/11/2015
Viyiz étout: