Les Pages Jèrriaises

Un rêve

J'vîsitis eune p'tite stâtion d'radio à la campangne. Ch'tait raîque eune p'tite office et l'compteux d'la réception avait un microphone où'est qu'lé présenteux annonchait les prédictions du temps et tout chenna. L'avant au compteux (tchi 'tait êl'vé en driéthe) y'avant un banc en bliu sus tchi nou pouvait s'agenouoilli pouor pâler au présenteux endrait.

J'portais eune grande câsaque mais nou m'offrit eune couvèrtuthe pitchie pouor m'garder caud si j'voulais m'êtrav'ler sus l'banc pouor dormi. La danme en chèrge, habilyie en un blianc fro êtrait à courte cotelle, offrit d'graie eune p'tite tâssée d'café pouor mé et s'en fut par eune porte.

Y'avait du monde tch'arrivaient dans la stâtion d'radio et bétôt nou-s'y 'tait un mio patchi. À chein tchi pathaîssait, y'avait d's învités épis d'aut's gens, et nou sèrvit des p'tites beurrées. Pouor c'menchi y'avait des sèrveurées d'beurrées spéciales pouor l's învités épis d'aut's beurrées pouor l'restant des gens, mais y'en avait tant d'mangi qu'bétôt nou n's'en gênait d'aut' pouor tchi qui mangeait tchi beurrées.

Les beurrées avaient des tas d'choses sus: y'avait des tenvres tranches dé saûcichon et des chèrvettes. Mais les beurrées 'taient si câsuelles qué bétôt y'avait un tas d'saûcichon dans l'aithe et des chèrvettes dé tchées étout.

Épis nou s'dêhalit dans l'clios en driéthe d'la stâtion d'radio où'est qu'i' y'avait eune fête en allant. Lé clios 'tait grand et y'avait des stâlles dé marchi, mais ché n'tait pon touos les campangnards tch'avaient mênagi dé v'nîn vendre lus marchandises et lédgeunmes au marchi. Y'avait don des stâlles tchi 'taient vièdes.

En pâssant par les stâlles, où'est qu'les gens lus ent'-pâlaient, j'vis la faithe à fanne au bas du clios. Acouo eune fais y'avait des grandes attractions, carrousels et grandes reues, tchi n'marchaient pon, tchi n'taient pon en allant, mais y'avait des stâlles à gammes tchi 'taient en allant épis y'avait d'la dans'sie. Ouaithe qu'i' y'eûsse ieu des problièmes d'organnîsâtion, ch'tait eune bordée d'fanne tout comme.

Rêvé l'20/2/2021
 

Viyiz étout:

 

Les Pages Jèrriaises