Y'avait eune salle dé cliâsse, grande et modèrne et en forme d'L, tch'avait des tabl'yes et des tchaîses et tchi fut remplyie jusqu'ès g'nouors (et un mio pus) dg'ieau. J'tais pouor ensîngni coumme tchi nagi souos l'ieau. Ch'tait à seule fîn d'copier eune pétite ourse en pliuque tchi 'tait habilyie en pliongeux auve des cylîndrées d'air sus l'dos. Mé j'avais des cylîndres sus l'dos étout mais i' n'taient pon remplyies: i' 'taient raîque pouor la pratique. L'ieau 'tait troubl'ye et n'y'avait pon assez d'run pouor bein nagi. Pus tard les tabl'yes et tchaîses avaient 'té areunnées un mio et ch'tait pouor èremplyi la salle dg'ieau finne et cliaithe mais l'problième 'tait d'garder la salle clioutiche. La porte tchi s'adonnait sus la bliête 'tait ouèrte.
J'tais dans eune aubèrge en Irlande du Nord. Les gens 'taient aimabl'yes. Au cabathet, quand nou voulait c'mander ses bouaissons, nou-s'avait à s'mâter au compteux s'lon l'abc pouor chein qu'nou voulait c'mander. Mais tréjous s'lon la prononciâtion Nord-Irlandaise du nom d'la bouaisson.
J'tais à m'pronm'ner par eune grande talustre en Sèr. J'portais eune grande câsaque et la mé 'tait rude. Y'avait des grandes louêmes contre la talustre. À la montée j'montais à la Seigneûthie. Y'avait des dgitares par lé c'mîn. Y'avait eune fête dans les gardîns d'la Seigneûthie et un tas d'musiciens. J'n'allis pon à la fête. Y'avait eune touônnée dgidée tchi 'tait pouor finni. J'jouaingnis la touônnée et quand ou 'tait finnie l'dgide m'offrit un pâssage dans eune manniéthe dé mini-vaituthe. J'arrivînmes à la caûchie où'est qu'i' y'avait des grands casinos touos illeunminnés auve des êcritchieaux à p'tites veues. Y'avait des bâtisses tchi touônnaient. Et y'avait tchiques vielles maîsons et boutiques tch'avaient des p'tites ruettes ou allées d'dans. La mini-vaituthe cachit par l's appartéments dans les vielles maîsons. Épis j'marchais d'compangnie auve deux femmes tchi m'laîssîtent dans eune maîson. Ch'tait l'heuthe dé tchitter Sèr. J'allis à l'office à la caûchie. Y'avait un tas d'monde là, et hardi dg'ieux en costeunmes du temps pâssé. J'mé d'mandis s'i' y'éthait assez d'run sus l'baté. Mais y'avait des titchets d'restant. Man titchet pouor raller en Dgèrnésy m'couôtit un louis et j'èrchu eune ban'se étout pouor l'prix. Tout coumme sus l'êcritchieau l'prix des titchets d'èrtou 'tait mèrtchi à vîngt-deux louis. J'eus à pâsser des ban'ses à d'aut' pâssagièrs dans la tcheue. Eune hardelle en costeunme mé d'mandit d'l'èrlachi par driéthe. J'èrlachis sa breune capuchinne.
Rêvé l'17/2/2013
Viyiz étout: