Les Pages Jèrriaises

Un rêve

J'avais à changi d'train à Francfort, eune ville qué jé n'connais pon. J'tais pouor prendre un train à la stâtion d'Richardstrasse, mais l'train dans tchi j'arrivais à Francfort s'appréchait d'la stâtion d'Edouardstrasse. Chu train 'tait vraînment pus à co un tramouais, bein modèrne auve des grandes portes drissantes automatiques. Y'avait un tas d'pâssagièrs. Lé train s'arrêtit à Edouardstrasse et jé d'valis. Mais sus la pliateforme jé rêalîsis qué j'tais nueus-pids. J'avais laîssi mes bottes et cauches dans l'train. Les portes du train 'taient à lus freunmer et j'bliotchis l'entré-deux. Mais jé n'pouvais pon rentrer car y'avait tant d'monde. Eune d'mouaîselle tch'avait prîns ma pliaiche où'est qu'j'avais 'té assis, mé pitchit mes bottes et mes cauches rouôlées en balles et j'les gaffis. I' 'taient pourpres.

Un anmîn m'avait prêté un appartément en Înde. À la r'vèrdie j'pédalais amont un mont. Y'avait eune rose lueu et i' faîthait caud. La rue 'tait raide mais la pédal'lie 'tait aîsie car la rue 'tait bein draite ouaithe qu'ou fûsse longue. Lé c'mîn 'tait d'rose gravi, et l'paysage 'tait pons'leux auve d'la rouoge tèrre et des bouais et des pliantes d'un vèrt foncé auve des rouoges taques.

Rêvé l'26/3/2011
Geraint Jennings

 

Viyiz étout:

Les Pages Jèrriaises