J'tais dans un grand clios d'hèrbe, assis à dêtre acanté d'aut's gens (j'têmes à chein tchi pathaîssait, eune dgaîngue), et y'avait des gens assis et êtrav'lés dans l'aithe chîn' et là partout l'clios. I' faîthait bé, mais pon trop ensolilyi, et i' faîthait caud assez.
Au but du clios, y'avait un tèrrain un mio êl'vé - dans les deux mètres dé haut - coumme eune strade l'travèrs du but du grand clios. À dêtre y'avait un troupé dé lions couochis sus chutte strade; à s'nêtre sus l'pliat l'avant à la strade, y'avait deux-trais j'vaux êtrav'lés, châtchun auve eune pétite distance d'un mètre ou deux entre-ieux. Ch't' alîngnie dé j'vaux 'tait à l'êtchèrre d'la strade. Lé d'vant d'la strade 'tait en montée, raide pouor d'valer ou monter, et tout couèrt d'hèrbe coumme lé restant d'la strade.
Les j'vaux s'êcantîtent à présenter des triques. Preunmiéthement, un j'va montit amont la montée et sautit dé sus la strade par d'ssus du preunmié j'va épis r'bîndit pouor sauter pas d-ssus d's autre j'vaux couochis dans l'aithe.
La deuxième trique vînt auprès. Un j'va, ofûche lé même j'va tch'avait fait la preunmié trique, m'nit un pônôn amont la montée sus la strade pouor sauter. Ch'tait coumme si lé j'va 'tait pouor ensîngni au pônîn coumme tchi sauter par d'ssus les j'vaux dans l'aithe. Lé j'va sautit, et l'pônîn souotre li, par d'ssus d's aut' chévaux.
Épis les lions lus l'vîtent et rouôlîtent douochement ava la montée. Les j'vaux rouôlîtent ava étout. Y'avait eune douzaine ou eune vîngtaine dé lions, des lions, des lionnes et des p'tits lions, et i' lus pronm'nîtent avaû l'clios parmi les gens, douochement et ordgilleusement. Les gens n'taient pon êffrités. Les lions pâssîtent auprès d'mé. Un grand lion auve eune grande crîngnache et des grands ièrs m'èrgardait tchuthieusement en pâssant, sans atchuler. J'prîns la couvèrtuthe ou l'blianket sus tchi qué j'tais assis et m'enfliubit atout. Les lions lus en fûtent par driéthe mé.
Rêvé l'10 d'Septembre 2016
Viyiz étout: