J'tais dans eune salle à billard et la veue y 'tait bâsse et les tabl'yes 'taient vielles. Y'avait eune tabl'ye à snookèr dé tchi la couvèrtuthe 'tait rouoge foncé. Ch'tait d'y jouer eune gamme dé snookèr à patates, ch'est en tchi au run d'faithe sèrvi des balles dé difféthentes couleurs, fallait chouaîsi des patates dé difféthentes couleurs. Preunmiéthement eune patate tchi 'tait pus à co couleu d'rose pouor sèrvi d'rose balle, épis eune patate nétheâtre pouor pliaichi sus la tabl'ye sus la taque driéthe la rose patate, mais les mèrques sus la tabl'ye né 'taient pon aîsies à distîndgi, et j'avêmes-t-i' fait eune faute pouor tchi but d'la tabl'ye 'tait pouor la néthe balle? Épis eune vèrte patate et ainchîn d'siette.
Y'avait du monde, ofûche d'eune unnivèrsité, là-l'tou et nou jouit eune gamme dé snookèr atout les patates dé difféthentes couleurs. Les patates né boulaient pon bein et comme la gamme avanchait les patates vénaient êglanmies, et ch'fut d'mêtchi d'rempliaichi châque patate bûchie d'auve un annima, et bétôt y'avait un nièr et blianc tchian et des brébis dans la puthée d'patate tchi couvraient bétôt la salle à billard.
Pus tard, j'eus à aller organnîser l'acat d'eune neuve longue câsaque dé luxe pouor tchitchun - ché n'tait pon pouor mé. Dans la grande boutique nou r'quémandit eune longue câsaque couleu d'crème ofûche un mio jauneâtre, auve eune doublieuse en souaie d'or. Y'avait étout eune cheintuthe mais nou dévthait mett' la cheintuthe raîque pouor des occâsions spéciales.
Rêvé l'14/1/2022
Viyiz étout: