Les Pages Jèrriaises

Un rêve

J'tais dans eune bibliothèque au Nouvieau York. Y'avait eune office dans tchi eune d'mié-douzaine dé gens travaillaient sus des tchestchions d'archives, des c'mandes dé photographes et d'aut's tchestchions. Iun d's hoummes pâlait sus l'téléphône à tchitch'un entouor des photos, mais vraînment ch'tait entouor tchiquechose d'aut'. Par les f'nêt's dé ch't' office, j'viyais la grande rue tchi pâssait la bibliothèque. Y'avait tchiques vaituthes partchies, mais i' n'y'avait pon d'trafi. Lé solé lithait. Un grand ouaîsé arrivit, dans les deux mètres dé haut. Ch'tait eune grande grise et néthe cranne tchi s'pathannait au mitan d'la viède rue d'laîze atout ses longues gambes. Tchiques aut's grandes crannes arrivîtent.

Tchiques membres dé l'office 'taient împlyitchis dans eune dgaîngue dé voleurs - y'avait eune tchestchion dé dotchuments et d'banques. Y'avait des voleurs tchi portaient des vîsagiéthes. Dans un appartément nièrchi, y'avait eune rêunnion d'scientistes. Ch'tait un appartément à la vielle mode auve des vièrs meubl'yes, d's ais auve des vièrs livres èrliés en tchui, et des tchaîses en bouais auve des dôssièrs et gambes vèrtchis. Iun des scientistes présentait des r'chèrches auve du radgium, et y'avait des galots tchi lithaient dans la nièrcheu d'l'appartément. Y'avait tchique lian auve lé crînme. Ma grand'méthe arrivit acanté un grand nièr tchian. Lé tchian 'tait bein aimabl'ye et s'couochit dans la carre d'l'appartément où'est qu'i' y'avait des lyits.

Rêvé l'22 d'Févri 2011
Geraint Jennings

 

Viyiz étout:

Les Pages Jèrriaises