Les Pages Jèrriaises

Un rêve

J'vîsitis un mouaine Norvégien dans san monastéthe. Vraînment, ch'tait un hèrmitage car i' 'tait à san tout seu dans eune manniéthe dé caûminne en bouais bâtie dans les branques d'un bouais dans eune bouaîs'sie. Les muthâles 'taient en plianches, entré tchi nou viyait les bouais en d'houors. Sus les plianches y'avait d's icônes, et dans san p'tit monastéthe lé mouaine avait des chandelles et des livrets à vendre. Lé mouaine m'explyitchit qu'nou voulait freunmer les p'tits monastéthes Norvégiens. Épis j'pédalis au thiâtre. Y'avait deux grandes salles vaîthinnes dans l'thiâtre. I' 'taient êcliaithies bein sombrément. Les sièges 'taient en pourpre v'lou. Dans châque salle, la strade 'tait bâsse, quâsiment au nivé d'l'aithe, et couvèrte dé plianches, et n'y'avait pon d'décothâtion et tout chein qu'i' y'avait sus la strade êcliaithie 'tait eune colonne ou ofûche un sîmpl'ye trou d'bouais au mitan. J'pédalis dans la preunmié salle. L'acteu 'tait là sus la strade à espéther l'audienche - la salle 'tait viède. I' portait un fa d'dînner et avait eune barbe pouaintue. I' 'tait pouor présenter eune vèrsion d'Hamlet pouor eune pèrsonne en Angliais. J'pédalis dans la deuxième salle à côté et j'amathis la bike du bord d'la strade. L'acteu dans chutte salle portait li étout un fa d'dînner mais i' n'avait pon d'barbe. I' 'tait Norvégien, et 'tait pouor présenter la vèrsion d'Hamlet pouor eune pèrsonne en Norvégien, mais l'audienche n'tait pon arrivé, et ch'tait dêjà l'heuthe, et i' mé d'mandit si j'voulais rester pouor la présentâtion. Jé n'voulais pon lé d'sappouainter car i' 'tait bein nice, mais jé n'voulais pon vraînment pâsser d's heuthes dans l'thiâtre à r'garder la pièche en Norvégien et mantchi l'vîn d'hounneu. J'li'explyitchis qu'malheutheusement l'Ambassade d'la Norouague avait învité l'monde à un vîn d'hounneu chutte séthée-là et né v'là pouortchi qu'i' n'y'avait pon d'audienche pouor la pièche. J'm'en fus. Y'avait eune dgaîngue dé gens tchi voulaient disteurber les fêtes.

Rêvé l'21/4/2011
Geraint Jennings

 

Viyiz étout:

Les Pages Jèrriaises