Nou m'avait envyé à la stâtion d'police pouor eune duithie. Nou m'laîssit dans eune allée et jé n'savais pon dans tchi salle qué j'tais pouor aller. Des policemainnes mé pâssîtent et i' lus en fûtent dans eune salle pouor eune rêunnion, et don j'entris dans eune aut' salle tchi sembliait êt' la salle pouor la duithie. La salle n'tait pon prête. Y'avait des tchaîses partout et un brun sofa. Lé sofa avait 'té êcliaitchi d'blianche peintuthe dans tchique bordée et avait 'té néglyigi. La salle 'tait pons'leuse et y'avait des pliantes en pots. D'la tèrre dé d'dans les pots avait 'té êtrueûlée sus des tchaîses. Pus tard, y'avait du monde dans la salle, mais jé n'savais pon tch'est qu'ou 'tait la duithie pouor tchi qu'nou m'avait envyé à la stâtion d'police. Y'avait des sannouiches et d'tchi à mangi mais n'y'avait pon d'tchaîses conv'nabl'yes pouor nos y'assiéthe. J'têmes don, mé et eune belle femme, êtrav'lés dans l'aithe à mangi. J'prîns ieune des pliantes en pots. Y'en avait auve des vèrtes fielles et des pouorpres fielles. J'pînchis des fielles pouor les senti et ch'tait coumme d'la menthe. Jé dis à la femme qué ch'tait probabliément pouor graie du thée à la menthe. Ou r'niflyit les fielles et accordit. J'lî d'mandis s'ou savait pouortchi qué j'têmes ichîn à la stâtion d'police. Ou m'rêponnit qu'oulle avait 'té envyée étout sans saver pon trop pouortchi mais san deuxième bouonhomme criyait qu'les neuches 'taient la partie la pus chiéthe d'un mathiage.
Rêvé l'5/9/2024
Viyiz étout: