à Portinfé,
Saint Ou.
Moussieu l'Editeu,
Le temps par siez nous est si fraid que si la Merrienne permettait, et voulait m'apporter chein tchi m'fallait, j'crais réellement que j'prendrais raichine dans man liet, mais malheutheusement ou n'est pas de ch't' avis-là. Au matin, ch'est: "T'en-vas-tu te l'ver, piércheux?", ou “As-tu l'idée d'rester là tout l'jour?", ou d'autres complyiments d'la sorte. Ou n'a autchune sympathie pour un pouôre balloque tchi n'a jamais aimé san liet mûs qu'à ch'teu', sinon p't'être quand j'tiomes nouvieaux mathiés. Si j'en avais la forche j'm'en ithais avec une autre, mais hélas, j'en ai l'voulé, et ch'est tout.
Ch'est ocquo des élections. Dans la Campagne y'en a yunne à Saint Louothains et une autre à Saint Piêrre. Quant à Saint Louothains, l'Ernest Le Cornu m'a dit que ch'est vrai tch'i' n'a jamais yeu peux d'une femme, et, s'il en veint à chonna, d'un homme ni-n'tout. S'i' voulait attraper un îndividu par la pé du cô et l'fliantchi à la route, je n'crais pas tch'il éthait hardi d'peine, rmême à l'âge tch'il a.
En Ville i' pouôrrait y'aver de bein drôles de r'sultats, car y'a tant d'candidats dans les trais districts que l's électeurs ne s'en vont pas saver comment voter. À Saint Sauveux y'a par chein qu' j'en comprends, trais candidats pour une vacance dans yun des trais districts, mais nou m'dit que les électeurs restent bein trantchilles. À Saint Louothains, le Sieur Pipon tcheint ocquo bon, niais à Saint Piêrre, comme je l'avais dit, nou n'sait à peine tchi craithe, et je n'peux pas dithe pûs que j'n'avais dêjà dit. J'ai r'mertchi d'vant que autchune chose peut s'arriver dans la pâraisse à Jean Elie Martin aut'fais. Si ch't' homme-là pouvait m'ner la pâraisse comme i' l'am'nit pour tant d'années, je n'voudrais pas dithe que tchique jour la Grande Vingtaine n'en produitha pas un semblablye.
Mais, Moussieu, la grande nouvelle ch'est que l'Pape s'en va visiter la Palestine, et y'en a tchi disent tch'y pouôrrait même v'nin en Jèrri, car il a entendu qu'ichîn à Saint Ou les natifs sont bein difficiles à persuader tch'ils ont tort. J'sais que l'Pape est un raide bouon homme, mais nou dév'thait li dithe qu'un vrai Saint Ouënnais est pûs difficile qu'un Juif, et une Saint Ouënnaise ocquo pièthe, à convaincre. Ch'n'est pas pour dithe tch'i' sont miyeurs que d'autres, mais tout simplyement tch'i' sont difféthents, surtout les Gris-Ventres.
L'Comité des Finances, ayant fini lûs djobbe pour le moment, nos disent, comme de couôtume, que Jèrri est hardi en dette, mais quand veindra l'Budget au mais d'Avri, j'nos trouv'thons avec hardi d'sous dans l'côffre-fort. Ch'est amûsant, et ch'n'est pas sérieux. J'crais quand-même que parmi les hôteliers y'en a qu'appréhendent pûs qu'un mio chein tchi pouôrrait s'arriver pus tard. Nou lûs a dit que les visiteurs angliais et français pouôrraient aller visiter ailleurs, et chonna lûs a fait nma dans la partie du corps que les gens communs appèlent les boudins.
L'Juge Vouaisin est à l'Hôpita, et, i' pathait, pour tchique temps. J'n'avons pas tréjous accordé, li et mé, mais s'il a 'té un mio difféthent que j'éthais 'té dans ses jugements par bordée, i' n'faut pas oublié que n'y a jamais yeu un Vouaisin tchi n'a pas souffert d'la même maladie.
A bétôt,
Evening Post 11/12/1963
Viyiz étout: