Le Ménage ès Feuvres,
St. Ouën.
Lé 28 dé juîn, 1980.
Moussieu l'Rédacteu,
A m'suthe qué j'viellis, j'trouve tch'i' m'faut pus d'dormi qué jé n'soulais. Quand j'mé mets dans la tête dé faithe un p'tit somme, prîncipalement l'arlévée auprès dîner, j'm'allouangne dans ma grand' tchaise au pid d'l'âtre dans la salle et mé v'là, bein enbonn'te quand i' n'y'a pon d'feu dans l'âtre, prêt pour eune bouanne heuthe dé dormi.
L'aut' jour j'dormais comme un pourpais dans chutte grand' tchaise quand un anmîn gangnit m'vaie. I' m'connaît bein, et quand i' n'mé trouvit pon dans la tchuîsinne où'est qu'j'éthais deu êt' à laver mes vaissieaux du dîner, i' s'avîsit bein qué j'tais endormi dans la salle, et en entrant d'dans i' s'mînt à chanter "Lô-lô" comme nou l'chantait ès p'tits êfants l'temps pâssé, mais, à haute vouaix. Ma fîngre, comme il appréchait d'mé j'me rêvilyis d'man souô-disant p'tit somme tch'avait dêv'loppé en profond dormi, et criyant qué j'tais dans man liet et au matîn, j'lî dis, "Bon! Té v'là dêjà d'but! Mais comment qu'tu'as entré auve toutes les portes bârrées?" Quand i' s'mînt à rithe et qué j'èrprannais mes sens, et qué j'viyais l'âtre d'vant mé, j'm'apèrchus bein qué j'tais dans la salle et qu'j'avais dormi trop à la pliaiche d'acliâsser et finni par faithe un p'tit somme.
En pâlant d'"Lô-lô", v'là tchi m'ramémouaithe l'arînmée d'nouôrriche qué nou chantait pour endormi les p'tchiots y'a eune huiptantaine d'années. Ou vaut la peine d'èrcorder viyant qu'un tas d'jannes d'à ch't heu né l'ont janmais ouîe. La v'chîn:-
Lô-lô, lé p'tit cannot
Tchi saute dans l'ieau,
Tchi pond dans l'ieau,
Tchi dort dans l'ieau.
Et pis la m'mèe èrquémenchait à "Lô-lô, lé p'tit cannot" et continnuait jusqu'au moment qu'lé p'tchiot s'endormait.
Eune aut' arînmée qué nou chantait ès êfants en les craûlant pour les faithe dormi était:-
Châchons! Bul'tons!
Ma grand'méthe est au paîsson;
S'oulle en a, j'en éthons,
S'ou n'en a pon
J'nouos en pâss'sons!
I' y'a des ditons, étout, entouôrre la dormithie. L's anciens, quand fallait s'mêfier d'eune pèrsonne tch'était trantchil'ye, r'tchîngneuse et malinne, disaient "I' faut s'mêfier d'l'ieau tchi dort", ou "I' n'y'a piéthe ieau qué l'ieau tchi dort." Un aut' diton nouos dit qué "Pouôrreté endort, richesse rêvil'ye," voulant dithe qué la pouôrreté fait les gens abandonner et qu'la richesse les fait s'êmoûtchi. avouo un aut' diton nous dit qué quand l'cat dort les souothis jouent!
Et né v'chîn eune dévinette entouôrre le dormithie:-
Pendile pendait, dormil'ye dormait:
Pendile tchit sus dormil'ye
Et dormil'ye mangit pendile!
Sav'-ous tch'est qué ch'tait? Eh bein, y'avait eune tchênelle dans un tchêne et ou tchit sus un quétot tchi dormait au pid du tcvhêne, et i' s'rêvilyit et la mangit.
J'ai ouï qu'un homme né f'tha janmais mêché quandi tch'il est à faithe ieune dé trais choses - à mangi, à liéthe ou à dormi. Ch'est damage qué touos les malfaiteurs qué j'avons en Jèrri ches jours n'apprannent pon nouos vièrs ditons pour en profiter.
I' m'sembl'ye qué la grand' partie d'nous membres campangnards dans L's Etats sont à dormillonner quand l'autorisâtion d'dêpenses veint sus l'tapis, car s'il' 'taient bein rêvilyis i' pens'saient deux fais d'vant dithe "Pour!".
J'me d'mande souvent ou'est tch'i' puchent touos les sou tch'i; votent si aisiement et auvre si p'tit d'ardgument, nouos membres d's Etats. Ch'est p't-êt' les boutitchièrs tchi l's env'yient au Trêsoryi, car i' daivent en aver tout pliein. Nou n'peut pus acater qué trais ou quatre articl'yes à la boutique à ch't heu pour un louis!
George d'La Forge
Viyiz étout: