Le Ménage ès Feuvres,
Lé 30 septembre, 1965.

Moussieu l'Rédacteu,

N'y a pon fort dé monde dé nouos jours tchi craient ès rêves, mais ch'tait aut' affaithe quand j'tais mousse, et ch'tait acouo bein pièthe y'a un coupl'ye d'chents ans! J'ai tréjous l'nez fouôrré dans les vièrs almonnas, et j'liêsais tchiques crianches au sujet dans iun l'aut' jour. S'i' y'en a parmi vouos lecteurs tch'y craient acouo i' pouorront p't êt' nouos dithe si les crianches dé lus temps èrsembl'yent ès cheinnes du temps jadis.

Quand l's anciens rêvaient d'l'ouognon, d'l'âle ou d'autcheunes hèrbes tchi n'sentent pon à bouan, ch'tait sîngne dé brit auve tchitchuns. Ch'tait mauvais sîngne dé rêver qu'nou viyait eune âne couôrre, mais i' n'est pon dit tchi sîngne est-che dé vaie eune âne à deux pids couôrre! Ch'tait bouan sîngne dé rêver qu'nou montait dans un bouais, mais l'contraithe si nou tchiyait bas dé d'dans l'bouais. quand nou-s y r'fliéchis ch'essait bein d'même étout si v'la tch'i' s'arrivait rêéllement!

Dé rêver qu'nou-s avait eune bastaure auve tchitchun d'vant qu'd'êt' mathié voulait dithe qué nou s'n allait dév'nîn amouotheux. Ch'tait sîngne dé pauvrété et d'mînsèthe dé rêver qu'nou marchait dans l'pité. S'nou rêvait qu'un cat sé r'bînfrait et vouos îngrînfliait quand nou-s êprouvait à l'mett' déhouors, ch'tait sîngne qué nou-s allait êt' attatchis par des voleurs! Né v'la un fanmeux avèrti pour mett' les gens sus lus gardes!

Dé rêver qu'nou-s avait les gu'veux bliancs 'tait sîngne dé jouaie. S'i' 'taient nièrs, sîngne dé tristesse, mais s'il' 'taient rouoges, sîngne dé prospéthité. Si ch'tait à ch't heu i' faudrait en înventer, eune racachie d'sîngnes, entouorre les gu'veux, dépis qu'les femmes les teingnent dé touotes les couleurs souos l'touannement du solé!

Si l'rêve 'tait qu'nou montait eune êtchelle, ch'tait sîngne d'honneu à l'av'nîn, mais ch'tait sîngne dé pèrte et d'danmage dé rêver qu'nou d'scendait l'êtchelle.

Ch'tait sîngne dé profit et d'rêussite en conmèrce dé rêver d'navets et d'concombres, mais sîngne dé maladie d'rêver qu'nou dansait à des neuches. Si nou rêvait qu'nou s'lavait l's ouïes, ch'tait sîngne qué nou s'sait obéyis et sèrvis fidèlement par domestiques et ouvriyèrs.

Rêver d'un paön voulait dithe qué nou mathiêthait eune belle femme, mais lé livre des rêves né disait pon tch'est tch'i' s'arrivethait si un homme dêjà mathié avait chu rêve-là.

Dé rêver qu'nou 'tait à tchilyi des pommes voulait dithe qué nou s'en allait êt' chicangnis par tchitchun, et ch'tait sîngne dé maladie dé rêver qu'nou mangeait d'la salade. Ch'tait mauvais sîngne, étout, dé rêver qu'nou 'tait à faithe san testament.

Pour un homme tchi n'tait pon mathié, ch'tait sîngne tch'il allait bein vite trouver femme et s'mathier s'i' rêvait qu'tchitchun lî donnait un vèrre pliein dg'ieau!

Jé n'sai pon s'i' y'avait la ponserêsse dans chu temps-là. Quand j'tais mousse, dé rêver "la rouoge trie" 'tait a bein près la même chose. L's anciens criyaient qu'des faûtômes, et même lé Satan, allaient par les c'mîns la niet, et quand il' en pâlaient duthant les longues séthées d'hiver es mousses avaient quâsi peux d'aller lus couochi, et v'la tchi lus donnait tchiquefais d'mauvais rêves.