à Portînfé, Saint Ou.
Jeudi au sé.
Moussieu l'Editeu,
Hier, en êcrivant ma lettre, j'vos éthais dit que siez-nous, et j'espéthais partout l'Ile, toute la natuthe se réjouissait, car, pour la preumié fais ch't'année, nou pouvait dithe que ch'tait le preumié jour du printemps. Nou-s-a tréjous dit que, étout, ch'est l'jour quand touos les p'tits ouaisieaux se mathient, mais i' y'a des exceptions, car dans l'fôssé d'l'autre bord d'la route y'a une rouoge-gorge à couer et y'a hardi d'linnots, par chein que j'en ai veu, tchi n'ont pas voulu attendre si longtemps. Mais agniet, Moussieu, nos r'v'là en hivé. I' fait une fraid d'tchan, i' vente une demié-tempête, et i' tchait d'la plyie sans un instant d'arrêt. Tchèsque nou peut penser de chais changements d'temps, sinon que, comme tant d'autres choses, les temps sont changis. Quant à un êté si caud que nou-s-étha d'la peine à l'enduther, je l'craithais quand je l'vêrrais, mais pas d'vant.
En paslant du temps, Moussieu, i' faut que j'vos diche que, par chein que la Merrienne voudrait à ch'teu', je qu'menche à craithe que sa vielle tête est déjà un mio cratchie, car ou voudrait m'faithe accater une couvertuthe éléctrique. I' s'adonne que y'a tchiques jours yunne d'nos vaisins, tch'éthait fait mûs d'taithe sa becque, vint ichin pour une tâsse de tais, et en conversant ou dit à ma bouonnefemme que y'avait un Angliais d'meuthant dans la pâraisse de Saint Hélyi tch'avait trouvé l'moyen de s'garder bein caud de niet. "Il a une couvertuthe éléctrique," ou continuit, "épis une boutelle à l'ieau-caude, et sûs chonna djix couvertuthes ordinaithes."
"Ecoute, Merrienne," je l'interrompis, "chein qu'tu dis là est du gniolin, car souos tout chonna un homme éthait êtouffé."
"Pourtant," ou dit, "bein lyien de s'être êtouffé, il est en parfaite santé."
"Tant mûs pour li," j'li dis, "mais si tu crais qu'un homme comme mé, tch'est Principâ d'Pâraisse, et tch'éthait, sans autchune doute, 'té êlu Seurveillant s'i' n'avait pas, comme Collecteur d'Aumônes, fait tchiques petites mêprinses en comptant chein qu'les fidèles avaient contribué, si tu crais qu'un bouon citoyen comme mé s'en va s'laissi suffotchi souos une couvertuthe éléctrique, une boutelle à l'ieau-caude, et djix couvertuthes ordinaithes, tu peux aller - "
"Nennin, nennin, Ph'lip," ou m'arrêtit. Je n'te d'mande pas chonna, Tout ch'que j'veur ch'est la couvertuthe éléctrique pour cauffer l'liet. J'pouôrrons la mettre en action après l'tais et la dêfaithe en nos couochant. I' m'semblye que ch'n'est pas te d'mander hardi."
"Et," j'li d'mandis, "tchèsqu'i' s'en va péyi pour chutte couvertuthe éléctrique?"
Chonna, Moussieu, finit l'affaithe, car je n'avons pas les sous, ni yun, ni l'autre, et nou n'peut pas accater ditet à crédit.
Mais, Moussieu, je n'ai autchune doute qu'ous avez liut l'rapport de chutte grande assembliée d'fermiers tchi fut adressie par notre "J.J." Tchèsque ous-en pensez? Criy'ous que chutte pétition tchi fut signée par prèsque tous tchi 'taient là étha autchune r'sultat, ou se trouv'tha t'alle parmi touos les dotchûments tchi s'trouvent abandonnés et oubliés au Greffe? Quant à mé, je n'crais pas chonna, mais ch'est seux et certain que l'Comité d'Agritchultuthe s'sa forchi de prendre des m'suthes s'i' veur continuer comme il est. La pétition n'peut pas être inouothée.
Chein qu'a hardi êtonné la Merrienne ch'est d'aver veu lé "J.J." r'appathaître sûs une estrade après aver dispathu pour un couplye d'années. Oulle admet tch'i' n'tait pas oublié, car, quand i' sont hors d'la mémouaithe pour une pôse, i' sont bein lyien d'être tout-à-fait oubliés, chais individus-là.
Ph'lip
Evening Post 19/2/1963
Viyiz étout: