Quant l'voillyit il tait buttèt dessus aterrit,
Y s'rendit à la prumièthe hotel tchi trouvit,
Et entrant tout grand sans tappé y d'mandit
Si chein qu'il y avait occouo du run pour y louogit.

"Asseuthètment, et pourtchi pon," s'fit l'hotellyit,
"J'sis bein lyien en chutt' saison chein, d'avait tout remplyit,
Et sou voulez unn' chambrette pour y couochit,
Eh bein, vous pouvez en avait yieunne à bouan marchi."

V'la tchi fut bein vite settlé et arrangi,
Et notre ordjilleux à table d'hote s'assiévit,
Un raide bouan soupé caud lys fut servi,
Et sans pus d' autres complyiements y s'mint à l'mangi.

Quand y n'en put pus d'autre maulait et blyatchit
Et eut satisfait à gogo tout s'n'appétit,
L'heure et l'moment vint que l'horloge sonnit,
Onze heuthes - appréchies d'mingnièt - grand temps de s'jutchi.

Mais d'vant ch'la, chennechin s'n'hote ly chuchottit :
"Si chaique y voullait une Ecauffeuse au pid du lit?"
Tout bouann'ment notre émigré ly réponnit :
" Bain bouanne idée qu'vos avez yieut; d'accord man vit."

Bon, pour vouos dithe, derchet dans sa niche s'coullit,
A tâtons, faut craithe, parce que quand y s'y catinit,
Sus sa pallyioche tchique chose s'mint à y bougit :
Ch'tait s'n'Ecauffeuze tchi avait été enviée s'y muchi.

Oulle gigottait tant, qu'n'otre mouse s'effritit
Et faisant des braits piteux, hors d'sa vaie bondit
D'une avollée - ès fins feux d'galop, - s'sauvit
A Cote Cauchie - gaffe avithons - r'trouvi Jerri.

Ch'est chein tout l'histouèthe ou conte fait à plaizi,
Mais si n'c'est pon vrai - peut y être - attendez un p'tit:
A d'grands maux faut d'grands remèdes, l'docteu nou dit,
Ben, restez sièz vous : N'vous mettez pon Terre-Neuvi!

JEAN POUPETTE.
5/11/28